Juan Carlos Francisco urxe á Xunta a desenvolver o polígono de Tamagos-Verín logo de 10 anos paralizado

Acusa ao goberno galego de ter bloqueado o desenvolvemento do Polígono dende a súa aprobación en 2011

O parlamentario socialista Juan Carlos Francisco reclamoulle hoxe á Xunta que desbloquee o desenvolvemento do Polígono de Tamagos, en Verín, que leva 10 anos paralizado dende que aprobaran o proxecto sectorial en 2011. Francisco presentou unha pregunta oral a conselleira de Territorio, á que urxiu a retomar un proxecto “estratéxico e fundamental” para Monterrei e hoxe convertido nun “monte abandonado”.

Juan Carlos Francisco lamenta que o bloqueo por parte do goberno galego teña malogrado as iniciativas do concello para desenvolver un Polígono de solo industrial de calidade, perfectamente conectado con Vigo, Madrid e Portugal, e que conta con 290.000 metros cadrados de “silvas e matogueira”. Un total de 127 hectáreas, dixo, das que a Xunta conta co 75 por cento, mentres o 25 por cento restante está pendente de expropiación.

Sinalou que o outro polígono da comarca, o de Pazos, dispón de 3 parcelas dispoñibles por un total de 9.000 metros cadrados, pero en zona inundable, o que multiplica os custes notablemente e pon en cuestión a viabilidade para atraer investimentos.

10 anos de parálise

O Polígono de Tamagos, explicou, é un proxecto que se remonta ao goberno presidido polo socialista Emilio Pérez Touriño, que permitiu que o proxecto fora aprobado no Consello da Xunta do 20 de abril de 2011. Sen embargo, dende entón o goberno galego non fixo nada para desenvolver as licitacións, por moito que dispoña da competencia para o seu desenvolvemento a través do Instituto Galego de Vivenda e Solo.