Noa Díaz urxe á Xunta a lanzar os novos títulos de doutoramento propostos polas universidades para o curso 2021-2022

A voceira de Cultura subliña que as propostas das universidades “están perfiladas” e darían a posibilidade de realizar doutoramentos a alumnado que ata o de agora non dispoñía deles no se centro

A socialista Noa Díaz vén de urxir á Xunta de Galicia a lanzar as novas propostas de doutoramento para o vindeiro curso 2021-2022. Fíxoo, hoxe, na Comisión de Educación do Parlamento, a través dunha pregunta á Secretaría Xeral de Universidades.

A responsable socialista sinalou que “estamos a mediados de marzo e nada sabemos sobre que vai pasar cos novos doutoramentos”, o que presupón que “podemos ir tarde para definir os títulos que deberan estar en marcha en setembro de 2021”.

Respectando o marco normativo primeiro, incidiu Díaz, durante 2020 as universidades galegas prepararon as súas propostas de programas de doutoramento para implantar o curso 2021-2022, que “presentaron en tempo e forma”. Pero, finalmente, lamentou, “a Secretaría Xeral de Universidades denegou todas as propostas aducindo que ía abrir un tempo de reflexión sobre o mapa de titulacións do Sistema Universitario Galego”.

Díaz subliñou que a denegación destas propostas “non se baseou en cuestións técnicas que determinasen deficiencias nos informes, senón unicamente na decisión de repensar o mapa de títulos”.

“Algúns dos títulos propostos polas universidades darían, por vez primeira, a posibilidade de realizar estudos de doutoramento a alumnado que ata o de agora non dispoñía destes estudos específicos no seu grao”, destacou a socialista, remarcando a importancia de axilizar o proceso para que os novos títulos de doutoramento sexan unha realidade este mesmo ano.

Finalmente, Díaz sinalou que o conselleiro de Universidades anunciou no último Pleno que, a partir de 2022, os campus galegos ían estrear novos graos e mestrados, “pero nada dixo dos títulos de doutoramento”, o que incrementou a “incerteza” dos departamentos das universidades e do seu alumnado.