A portavoz de Igualdade do Grupo Socialista, Noa Díaz, vén de rexistrar unha batería de iniciativas no Parlamento de Galicia nas que apremia á Xunta a pór en marcha de maneira urxente un plan de acción para garantir a prevención, protección e a atención ás mulleres refuxiadas.

“Ese programa”, explica a parlamentaria do PSdeG, “debería sufragarse cos fondos non comprometidos en anos anteriores do Pacto de Estado contra a Violencia de Xénero”, de acordo coas posibilidades que ofrece o recente o Real decreto-lei polo que se adoptan medidas urxentes no marco do Plan Nacional de resposta ás consecuencias económicas e sociais da guerra en Ucraína.

En paralelo, Noa Díaz tamén lle reclama á Xunta que acelere o proceso para que servizos públicos ou entidades sociais colaboradoras da administración autonómica acrediten a condición de vítima de trata e explotación sexual, tal e como posibilita o mesmo decreto.

Polo miúdo, Noa Díaz explica que o Plan de resposta aprobado en marzo promove que se destinen os fondos do Pacto de estado contra a Violencia de Xénero de anos anteriores, e que non estean comprometidos, a pór en marcha todos os proxectos ou programas preventivos e asistenciais necesarios. Tamén se poden empregar esas cantidades a iniciativas que, no contexto da crise humanitaria derivada do conflito bélico, teña como finalidade garantir a prevención, protección e a atención ás mulleres refuxiadas.

Ademais, o paquete de medidas do goberno central tamén contempla medidas concretas no ámbito da atención á trata e á explotación sexual. Neste eido, o obxectivo é dar resposta ao risco que leva aparellado o desprazamento masivo de mulleres, nenas e nenos, tal e como alertan diversos organismos internacionais.

Así, unha das medidas incide no recoñecemento da acreditación de vítima de trata e explotación sexual, incluídas as mulleres que foxen do conflito armado en Ucraína.

En concreto, establécese que esa condición vai poder ser acreditada polos servizos públicos encargados da atención integral ás vítimas e ás entidades sociais debidamente recoñecidas polas administracións públicas especializadas na materia.

A deputada socialista subliña que “esa acreditación resulta moi importante” porque, entre outras cousas, dá acceso aos dereitos de información e derivación a recursos asistenciais establecidos na normativa estatal e no artigo 12 do Convenio de Varsovia. Tamén, no caso de cumprir o resto de requisitos, ao Ingreso Mínimo Vital.