Gonzalo Caballero rexeita o “ataque frontal ao ensino público” de Feijóo despois de despedir a máis de 800 profesores e profesoras de reforzo e agora negarse a cubrir máis de 200 baixas de docentes
Gonzalo Caballero sinala que “Feijóo está ao servizo de Casado para confrontar co goberno de forma irresponsable, en vez de resolver os problemas dos galegos e galegas”
17/12/2021
G. Caballero chama a afrontar os retos de futuro no 40 aniversario do Parlamento: “Cando superemos a covid, tocará actualizar o Estatuto para blindar novos dereitos da cidadanía”
19/12/2021
Lamenta o “abandono ao profesorado” do goberno galego ante “máis de 2.000 casos de covid vinculados a centros educativos”
O voceiro parlamentario do PSdeG, Gonzalo Caballero, rexeitou hoxe o “ataque frontal ao ensino público” por parte da Xunta despois de despedir a 868 profesores e profesoras de reforzo e agora negarse a cubrir máis de 200 baixas laborais de docentes nas escolas galegas.
En plena sexta onda da covid e cando “hai máis de 2.000 casos de covid vinculados a centros educativos, máis de 200 aulas pechadas e con máis 200 profesores e profesoras de baixa”, o dirixente socialista lamentou a “inacción” e o “abandono ao profesorado” da Xunta de Feijóo e do goberno do PP “que non quere cubrir as baixas e dotar de persoal suficiente á educación pública galega”.
“Están fallando á nosa comunidade educativa, como se evidenciou ao despedir profesores e profesoras e aumentar o ratio de alumnos por aula”, criticou Gonzalo Caballero despois de sinalar que esta cuestión “ten que ser rexeitada de forma contundente por todos os galegos e galegas”, xa que “unha aposta pola educación pública de calidade para todos e todas é fundamental para o futuro do noso país, e agora hai que reforzala pola covid”.
Neste sentido, incidiu en que “non é admisible” que o sistema de asignación de profesorado da Xunta, como regra xeral, non cubra baixas laborais inferiores a quince días, o cal “é grave”, unha vez que saíu á luz que, dende o 30 de novembro, a Consellería de Educación non está cubrindo as baixas laborais do persoal educativo nas escolas públicas.
“Ao PP non lle gusta a educación pública, só así se pode entender a xestión que está facendo da covid no ámbito educativo, a pesares de ter máis fondos ca nunca”, sentenciou o portavoz socialista quen vén demandando ao goberno galego, dende hai varios meses, que polo menos manteña o persoal educativo contratado durante a pandemia.
E por iso, concluíu, “os pais e nais e tamén toda a comunidade educativa témoslles que dicir ‘non’ aos recortes e retrocesos en educación que implica tanto Feijóo como as políticas do Partido Popular, xa que Galicia non pode permitirse recortar nun dereito fundamental como a educación pública”.
