O secretario xeral do PSdeG urxe a Feijóo a deixar de “crispar” e poñerse a “cooperar” e reclama a súa comparecencia no Parlamento cando Galicia supera os 600 contaxios diarios

O voceiro socialista chama á comisión de reconstrución a “non defraudar a Galicia” ante a maior crise que se recorda

Santiago, 27 de outubro de 2020. O secretario xeral do PSdeG, Gonzalo Caballero, amosou hoxe a súa “perplexidade” ante a nova “irresponsabilidade” de Feijóo ao dicir que “é demoledor” aprobar o estado de alarma para afrontar con garantías xurídicas a segunda vaga da covid. “Non merecemos un presidente da Xunta que diga que defender a saúde da xente e demoledor”, sentenciou, e reclamou que Feijóo “estea á altura” das circunstancias.

Cando se cumpren 43 anos da firma dos Pactos da Moncloa, Gonzalo Caballero remarcou a importancia dos acordos políticos nun momento no que o país está tendo que facer fronte a unha crise “de máis envergadura e de máis profundidade” que a dos anos 70. “Todos os responsables políticos teñen que colaborar e contribuír para unha saída desta crise na que ninguén quede atrás”, defendeu.

Precisamente por iso, o líder do PSdeG censurou que Feijóo apareza como “o líder autonómico que xera máis conflito” e que fai as declaracións de “maior gravidade”. “Cando os contaxios están en máximos, o presidente non pode seguir neste exercicio de irresponsabilidade”, sinalou, consciente de que “o demoledor é non ser quen de controlar a pandemia, ter máis de 600 contaxios ao día, ter afectadas as residencias de maiores…”.

Así pois, Gonzalo Caballero instou a Feijóo a abandonar “a estratexia de confrontación” co goberno e a “exercer as súas competencias reforzando a sanidade pública e as políticas sociais e protexendo a economía do país, que está tendo moitas dificultades nesta segunda onda da pandemia”. “Pedímoslle ao presidente da Xunta que rectifique, que deixe de crispar e se poña a cooperar”, remarcou, antes de requirir a súa comparecencia no Parlamento.

Ademais, ante as palabras de Feijóo respecto da crise reputacional que supón para o país a aprobación do estado de alarma, o máximo dirixente do PSdeG subliñou quei “non hai peor efecto” para a reputación dun país que “non tomar todas as medidas que sexan necesarias para loitar contra a propagación do virus”. “Ten que ter responsabilidade, sentido común e vontade de cooperación”, advertiu.

De feito, Gonzalo Caballero recordou que todos os países europeos están tomando “medidas análogas”, como ocorre en Portugal co estado de calamidade; en Francia, co toque de queda e a emerxencia sanitaria; en Italia co estado de alarma ou no Reino Unido coa emerxencia nacional. “Parece que Feijóo non entende que esta segunda vaga da covid é moi grave e que veñen por diante meses complicados”, apostilou.

Neste escenario, lamentou a “pouca información” que a Xunta está facilitando aos grupos parlamentarios e demandou unha comparecencia do presidente para informar sobre a evolución da pandemia en Galicia. “Pedimos información e responsabilidade”, concluíu, “e tomar todas as medidas para protexer á xente”. “Sen saúde non hai actividade económica nin actividade social”, finalizou o voceiro socialista no Parlamento.

COMISIÓN DE RECONSTRUCIÓN

En paralelo, no que atinxe á comisión para a reconstrución de Galicia, Gonzalo Caballero presentou un plan de traballo co obxectivo central de facer desta “a lexislatura da defensa das persoas” a través dunha labor “ben feita” dende a Cámara galega.

“Non defraudemos a Galicia, poñamos o mellor de todos nós para facer un bo traballo”, apelou, e presentou unha proposta que inclúe a comparecencia duns 40 expertos de distintos eidos (economía, sanidade, política social, educación, cultura, medio rural, medio ambiente, pesca, demografía, igualdade…) e representantes institucionais como os presidentes de FEMP e Fegamp.

Ademais, o máximo dirixente do PSdeG defendeu a necesidade de habilitar unha caixa de suxestións aberta a que a sociedade civil poida achegar propostas encamiñadas a colaborar no reto de construír a Galicia do futuro.

Finalmente, a comisión aprobou unha folla de traballo con 46 comparecentes propostos polos tres grupos parlamentarios en función da súa representación.

Así, están chamados á Cámara os reitores das tres universidades públicas galegas, os principais sindicatos, economistas de referencia como Fernando González Laxe, os representantes da Rede Galega contra a Pobreza e o Cermi, os responsables das residencias de Domus VI e a Fundación San Rosendo, a voceira de Trega (asociación de traballadoras de residencias), o presidente de REDE (familiares e usuarios de residencias), colectivos como SOS Sanidade Pública e Enfermeiras en Loita ou a Asociación Galega de Medicina Familiar, a responsable dos decanos de Educación de España, a vogal de Igualdade da Unión de Actores e Actrices, Berta Ojea, e os presidentes da FEMP e da Fegamp, entre outros.