Pide á Consellería de Educación que busque unha alternativa “máis axeitada” para ampliar a oferta de Formación Profesional noutros centros da cidade

A deputada pontevedresa Paloma Castro vén de instar á Xunta a manter a oferta educativa de Secundaria e Bacharelato no instituto Frei Martín Sarmiento de Pontevedra. Fíxoo, hoxe, logo de presentar unha batería de iniciativas neste sentido no Parlamento de Galicia.

“A Consellería de Educación está a actuar cunha total falla de transparencia e de costas aos intereses da comunidade educativa deste centro e, por iso, dende o Grupo Socialista esixímoslle que informen sobre o futuro a medio e longo prazo do instituto porque esta incerteza está a afectar a moitas familias”, sinalou Castro, tras lembrar que, na actualidade, o Frei Martín Sarmiento conta con 480 alumnas e alumnos.

No último ano, destacou, “a inspección educativa xa advertiu sobre a posibilidade de suprimir estes estudos para ampliar a oferta de Formación Profesional, pero o equipo directivo do centro non ten coñecemento algún sobre o plan previsto pola Xunta, malia que solicitaron información en repetidas ocasións”.

“Esta falla de información está a causar moitos prexuízos tanto entre as nais e pais do alumnado que dubidan á hora de matricular ás súas fillas e fillos nun centro que pode non ter continuidade; como entre o profesorado”, destacou, unha cuestión que “afecta a unhas 40 profesoras e profesores que, no caso de finalizar a oferta de ESO e Bacharelato, terían que ser trasladados a outros institutos”.

Por todo isto, Castro pediu á Xunta que busque unha alternativa “máis axeitada” para ampliar a oferta de Formación Profesional noutros centros da cidade e que informe á dirección do IES Frei Martín Sarmiento, á maior brevidade, sobre o plan de oferta educativa previsto para os vindeiros anos.