Julio Abalde denuncia que o Goberno galego está a incumprir o acordo que acadou cos sindicatos o ano pasado para fixar o máximo de estudantes por unidade

Critica a incerteza á que se somete ás familias, especialmente no rural, ao non comunicarlles ata finais de xullo onde serán escolarizados os nenos e as nenas

O voceiro de Educación advirte que a situación dificulta o acceso a axudas para material e servizos e que está a provocar o desprazamento de matrículas ás cidades

O portavoz de Educación do Grupo Socialista no Parlamento de Galicia, Julio Abalde, vén de presentar unha serie de iniciativas respecto da falta de recursos humanos no ensino público, o incumprimento das ratios de alumnos por aula e a tardanza en asignar centro aos estudantes. Os socialistas esíxenlle á Xunta de Galicia “que se tomen inmediatamente as decisións dos desdobres de unidades necesarias en aplicación dos acordos asinados pola Consellería” e, ao mesmo tempo, reclaman .que esas decisións se lles comuniquen “urxentemente” aos equipos directivos.

Abalde lembra que o ano pasado Goberno galego e sindicatos asinaron un documento que inclúe novos criterios de referencia para a fixación de ratios máximas de alumnado por aula. Lamentablemente, “non se están a respectar nin se ten en conta para o cálculo a presenza de alumnado con necesidades educativas especiais”, asegura.

O voceiro socialista explica que, pese a que a Consellería de Educación nega calquera incumprimento de cara ao vindeiro curso, “a realidade é ben distinta”, xa que o departamento autonómico “incumpre sistematicamente a súa obriga de dar resposta áxil ás familias e ao profesorado”. Basta observar que neste momento, cando se achega o inicio do curso e os centros están a preparalo, “os equipos directivos non saben aínda o número de unidades das que disporán e o profesorado descoñece o número de alumnos que terá nas súas aulas”.

En canto ás familias, un ano máis estiveron “en vilo” ata hai poucos días, porque, a consecuencia da redución do número de unidades e dos recursos humanos, “os centros non teñen acomodada a oferta de prazas ás demandas reais de escolarización para todos os solicitantes”. Iso leva a que parte do alumnado non saiba ata moi entrado o mes de xullo que centro se lle asignará, tal como acaba de acontecer. O problema é especialmente preocupante nos centros do rural.

A incerteza está a provocar que as familias que non teñen garantizada a escolarización nun centro do seu municipio decidan trasladar aos nenos e nenas a cidades próximas, “co conseguinte efecto no despoboamento nos centros do rural”, subliña Julio Abalde. Ademais, a demora dificulta, nalgúns casos, que pais e nais poidan tramitar as solicitudes de axudas para libros, material escolar ou servizos complementarios.

O deputado socialista indica que, na maioría dos casos, eses alumnos son escolarizados finalmente nos centros onde presentaron as solicitudes, de modo que se sobrepasan as prazas ofertadas nun principio. Un dos efectos é que, segundo veñen denunciando as federacións de ANPA, se van incumprir as ratios, ao agrupar unidades. Iso resulta prexudicial tanto para o alumnado como ao profesorado, que padecerán unha saturación “por riba do soportable”.

Julio Abalde critica que o problema ten a súa raíz na continua redución de recursos, especialmente humanos, para o ensino público, e insiste en que é “inadmisible” que a estas alturas do verán “exista incerteza nos equipos directivos e no profesorado acerca de como será a organización das unidades o vindeiro curso”.