A secretaria de Igualdade do PSdeG, Silvia Fraga, moderará a xornada que analizará os tres eixos do Pacto de Estado fronte á violencia de xénero vicaria, económica e dixital e que pecharán a alcaldesa da Coruña, Inés Rey, e a secretaria de Organización do PSdeG, Lara Méndez

A secretaria de Igualdade do PSdeG, Silvia Fraga, advertiulle hoxe ao PP que “non caben branqueamentos nin relativismo fronte á violencia de xénero”. Fraga anunciou hoxe a xornada da Escola de Pensamento Feminista “Paloma Rodríguez Vázquez” que organizan na Coruña as socialistas galegas para analizar o novo Pacto de Estado contra a Violencia de Xénero aprobado o pasado 26 de febreiro.

Reclamoulle ao PP que “deixen de branquear a violencia de xénero” e de “relativizar a gravidade” desta lacra “cando os presuntos agresores son membros do PP”. Neste sentido, emprazounos ademais a “abandonar o negacionismo” ao que o están levando os seus acordos coa extrema dereita e poña en marcha unha acción decidida contra a violencia machista.

A responsable socialista criticou a “hipocrisía” do PP galego, que onte falou da importancia da concienciación e sensibilización logo de que o propio director xeral de Loita contra a Violencia de Xénero dixera o pasado 1 de agosto que “o número de asasinatos non ten relación directa” coa intensidade destas políticas e cando están rexeitando tódalas propostas dos socialistas neste sentido.

Fraga emprazou ao goberno galego a “asumir e incorporar” á súa axenda de traballo as medidas engadidas ao Pacto de Estado, que pasa de 290 en 2017 a un total de 461 nun novo documento “ambicioso” cun incremento “substancial” para acadar “ferramentas concretas que salvan vidas” e que incorpora tres novos eixos de actuación fronte á violencia vicaria, económica e dixital.

Día Internacional

O PSdeG participará nas manifestacións do próximo martes en toda Galicia con motivo do Día Internacional da Eliminación da Violencia contra a Muller. A continuación, a propia Silvia Fraga moderará o próximo sábado a xornada da Escola de Pensamento Feminista sobre o Pacto de Estado na sede da Agrupación Local da Coruña, que analizará as medidas incorporadas ao acordo e o “declive” das políticas de prevención en Galicia que vén de sinalar o Consello de Contas no seu último informe.

A xornada comezará coa participación da presidenta do PSdeG e portavoz de Violencia de Xénero no Senado, Carmela Silva, para expoñer as medidas sobre violencia vicaria. A continuación, a responsable de coordinación das Unidades de violencia de Xénero da Delegación do Goberno en Galicia, María Debén, explicará as aportacións en materia de violencia económica incorporadas ao Pacto de Estado, e rematará coa intervención da responsable xurídica e de formación na asociación de loita contra a violencia de xénero Alvixe, Beatriz Sestayo, sobre violencia dixital.

A clausura correrá a cargo da alcaldesa da Coruña, Inés Rey, e a secretaria de Organización do PSdeG, Lara Méndez, que pecharán a xornada da Escola de Pensamento Feminista do PSdeG que leva o nome da intelectual socialista galega, mestra, psicóloga, escritora, deputada no Congreso e presidenta da asociación de axuda ás vítimas da violencia de xénero Alvixe Paloma Rodríguez Vázquez falecida en 2015.