O PSdeG advirte que a exclusión do lobo do LESPRE non cambiará a situación en Galicia “porque a Xunta é incapaz de facer o seu traballo, como demostrou no pasado

Os socialistas destacan que os problemas  xa existían e persistiron debido á incapacidade da Xunta para xestionar a coexistencia entre a fauna salvaxe e a actividade agrogandeira

A realidade, denuncian dende o PSdeG, é que entre 2013 e 2021, cando o lobo non contaba cunha protección especial, a Xunta apenas autorizou batidas específicas contra a especie

O PSdeG lamenta a hipocrisía do PP na votación celebrada hoxe no Congreso que permite a saída do lobo do LESPRE, unha medida que, aseguran non modificará a situación en Galicia porque cando pode xestionar o PP nunca o fai, como quedou demostrado cos datos anteriores a 2021, cando o lobo no estaba incluido no Listado.

Tal e como evidencian os datos oficiais, antes da inclusión do lobo no LESPRE en 2021, os problemas da gandería galega xa existían e persistiron debido á incapacidade da Xunta para xestionar a coexistencia entre a fauna salvaxe e a actividade agrogandeira. A realidade é que entre 2013 e 2021, cando o lobo non contaba cunha protección especial, a Xunta apenas autorizou batidas específicas contra a especie, o que demostra que o problema non era a normativa de protección, senón a ausencia de medidas efectivas.

Desde o PSdeG lembran que a experiencia europea indica que a clave para garantir a convivencia entre lobos e gandería é unha combinación de prevención, compensacións rápidas e controis puntuais, aspectos que a Xunta nunca implementou de maneira adecuada. Galicia foi a única comunidade autónoma que se negou a asinar o Plan Nacional de Xestión do Lobo, quedando así fóra das axudas estatais destinadas a medidas de prevención e compensación nos anos 2022 e 2023.

Dende o PSdeG  acusan ao PP  de buscar desviar a atención da súa falla de xestión, en lugar de poñer en marcha políticas efectivas para protexer a gandaría galega.

A realidade é que o impacto do lobo sobre a gandería en Galicia pode ser mitigado con medidas adecuadas, sinalan os e as socialistas. “Mentres Asturias e Castela e León incrementaron os seus fondos para a prevención de ataques mediante a instalación de valados ou o uso de mastíns, Galicia quedou á cola na súa resposta. Os ataques ao gando non aumentaron de igual maneira en todo o territorio galego, senón que se concentran en zonas con menos medidas de protección, o que indica que o problema radica na xestión e non na poboación de lobos”.

Neste sentido, critican que a Xunta do PP tivo anos para actuar e non o fixo: “Se os ataques aumentaron, a responsabilidade recae no Goberno galego, que non implementou os plans de control e prevención necesarios. O problema non é a protección do lobo, senón a inacción da Xunta de Galicia para garantir unha convivencia efectiva entre a gandería e a fauna salvaxe”.

Desde o PSdeG seguirán defendendo un modelo de xestión “baseado na evidencia científica, no apoio á gandería e na protección do noso patrimonio natural, fronte a unha Xunta que prefire mirar cara outro lado e utilizar este debate con fins partidistas”.