Paloma Castro propón a incorporación de terapias de recuperación asistida con cans de acompañamento como “unha medida máis” de apoio ás vítimas

A Comisión Institucional do Parlamento aprobou hoxe unha proposta do Grupo Socialista para reclamarlle á Xunta que impulse un programa de terapia asistida con animais de compañía adoptivos dirixido a vítimas de violencia de xénero. A portavoz de Igualdade do Grupo Socialista, Paloma Castro, presentou esta iniciativa como “unha medida máis” de apoio ás mulleres e menores vítimas.

A responsable socialista propuxo esta medida para actuar dende o apoio psicolóxico das vítimas en base á experiencia previa no tratamento sociosanitario e terapéutico noutras administracións, tanto estatal como autonñomicas, que ten ofrecido “resultados moi beneficiosos” para persoas que teñen sufrido situacións traumáticas. A presenza de cans de acompañamento, dixo, garante “apoio psicolóxico e emocional as 24 horas do día”, mellorando a autoestima, confianza e seguridade.

Sinalou que “os animais non substitúen ás persoas nin ocupan o lugar dos profesionais, pero achegan unha vía emocional directa, sen linguaxe e sen presión”. O seu papel ten cabida, dixo, á hora de reforzar o apoio psicolóxico ás vítimas, e supón unha medida complementario na loita contra a violencia de xénero, que parte da prevención e a sensibilización, fundamentais “para que estes feitos non se produzan ou para concienciar á poboación”.

Castro advertiu que a violencia de xénero é “unha consecuencia da discriminación estrutural que sufrimos as mulleres, e polo tanto a única forma de abolila é a prevención e a educación en igualdade”. Chamou a buscar unha sociedade que “rexeite os comportamentos discrirminatorios contra as mulleres”, na que “sexamos cidadás libres e camiñemos xuntos cos homes en pé de igualdade”.

Chamou a “seguir traballando” na erradicación da violencia de xénero, e “mentres tanto compre dar exemplo como representantes públicos e non tolerar ningunha forma de discriminación e violencia cara nós as mulleres”.

Texto da iniciativa aprobada hoxe:

-“O Parlamento de Galicia a que estudie a viabilidade de crear, dentro das políticas de fomento da adopción de animais de compañía, un programa de terapia asistida con animais a vítimas de violencia de xénero que poida supoñer o inicio dunha nova vida para o can e a súa dona”.