Paloma Castro recordou que a demanda responde “a un requirimento da veciñanza” e recriminoulle ao PP “que fale de asentar poboación nos núcleos rurais e logo non predique co exemplo”

O Parlamento aprobou hoxe unha proposta socialista para retomar a humanización da PO-531 en Barro, un novo paso de peóns en Curro e outro subterráneo en Bretoña. A parlamentaria socialista Paloma Castro presentou esta iniciativa, que foi transaccionada co PP, e coa que o Parlamento reclámalle ao goberno galego que retome esta promesa que ten xa 15 anos nos que fora esquecida dos Orzamentos da Xunta.

Entre as propostas aprobadas hoxe figuran a execución urxente da humanización da estrada entre a igrexa de Curro e o acceso ao polígono industrial, a construción dun paso subterráneo no lugar de Bretoña para o tránsito de vehículos agrícolas e un novo paso de peóns á altura da farmacia de Curro, como tamén o repintado dos xa existentes para garantir a súa visibilidade e, por tanto, a seguridade.

Paloma Castro defendeu unha iniciativa nese senso que, asegurou, responde “a un requirimento da veciñanza”, que leva anos reclamando cuestións como a dotación de beirarrúas, servizos básicos e a mellora das vías de servizo anexas á estrada, “que se atopan nun estado de deterioro que as fan practicamente intransitables”. Segundo precisou a deputada do PSdeG, trátase dunha intervención “imprescindible” nun punto onde se concentra, a diario, un considerable volume de tráfico.

A parlamentaria socialista asegurou que a petición “non supón nada desorbitado” e serviría para acadar melloras “fundamentais para o progreso e o benestar” tanto dos e das residentes na zona como das persoas usuarias dos servizos que se concentran nese treito. “Falan vostedes de asentar poboación nos núcleos rurais e logo non predican co exemplo”, recriminoulles aos representantes do PP pola inacción ante “unha actuación comprometida e que a veciñanza leva anos reclamando”.

Respecto desa obra entre a igrexa e o polígono, recordou que hai cinco anos a Xunta xa anunciara “posibles actuacións de calmado de tráfico”, pero desde entón “nada se fixo”, pese a que se trata dun treito de só 500 metros no que se concentran unha farmacia, un supermercado, unha perruquería e diversos establecementos de comercio e restauración, así como unha empresa cunha trintena de traballadores.

Texto da iniciativa aprobada hoxe:

-“O Parlamento galego insta á Xunta de Galicia a:

1. Dirixirse ao Concello de Barro para que formule unha proposta concreta de humanización da antiga PO-531 no treito comprendido entre a Igrexa de Curro e a entrada ao Polígono Industrial, así como do seu financiamento, de modo que poida ser traspasada ao Concello.

2. Retomar o proxecto de mellora da seguridade viaria e senda da PO-531 entre o polígono de Sequeiros e Curro, incluíndo a construción do paso subterráneo no lugar de Bretoña para o tránsito de vehículos agrícolas.

3. Estudar no proxecto a desenvolver como facilitar o acceso peonil á Farmacia de Curro, e proceder ao repintado dos xa existentes na PO-531, garantindo a súa visibilidade e seguridade”.