Carmen Dacosta denuncia que “non lles interesa que se analice a súa política laboral” logo de deixar sen executar en 2022 outros 215 millóns de euros para políticas activas de emprego

A portavoz de Política de Emprego do Grupo Socialista, Carmen Rodríguez Dacosta, reclamoulle hoxe á Xunta que active de inmediato os consellos de emprego autonómico, provinciais e territoriais. Dacosta presentou unha moción no Pleno do Parlamento para esixirlle á Consellería de Traballo que active os órganos de participación institucional, sen convocar no que vai de Lexislatura, e que foi rexeitada polo PP.

A responsable socialista lembrou a obriga legal do goberno galego de convocar cada seis meses ao Consello Autonómico, e cada tres meses aos consellos provinciais e territoriais, malia o que ata o día de hoxe seguen inéditos. Con esta decisión, dixo, o goberno galego “vulnera o dereito de participación institucional das organizacións sindicais, empresariais e das entidades locais”, mentres “deseñan as políticas de emprego de costas á realidade galega”.

Dacosta reclamou con esta proposta “que cumpran a Lei e que poñan en marcha políticas de emprego logo dun estudo rigoroso das necesidades, deseñando plans de emprego para os territorios elaboradas de abaixo arriba coa participación destas entidades, con control sobre o orzamento e que resultados obtén”.

Criticou que á Xunta “non lle interesa que se analicen os programas formativos, que inspeccións realiza a Xunta, os obradoiros de emprego ou os resultados de inserción” para “evitar que as eivas das súas políticas activas de emprego saian á luz”. Así o dixo antes de constatar que o goberno galego deixou sen executar 215 millóns de euros en políticas de emprego no ano 2022, co que suman xa 1.990 millóns desbotados dende 2009.

A consecuencia, dixo, é que en 2022 o 42,3 por cento das persoas paradas son paradas de longa duración, fronte ao 28,9 por cento que supuñan en 2008, mentres só o 30,9 por cento das persoas paradas está protexida, nunha Comunidade Autónoma que ten un 10,1 por cento menos de traballo que en 2008, xusto antes da chegada do PP á Xunta en 2009. A taxa de paro feminino é ademais case dous puntos superior á dos homes.

Carmen Dacosta sinalou que nos 14 anos de gobernos do PP a mocidade en Galicia “perdeu máis persoas, máis persoas activas e máis persoas ocupadas que a media do Estado, mentres a taxa de paro medrou máis que a estatal”. Explicou que a taxa de paro xuvenil duplicou o crecemento da media do estado, a pesares de que Galicia perdeu ao 28,3 por cento da poboación xuvenil entre 2008 e 2022, co 126.823 mozos e mozas menos.