Paloma Castro critica uns orzamentos continuístas que “abandonan ás persoas máis vulnerables” e reclama unhas contas “que garantan a igualdade, a dignidade e o benestar de todos e de todas”

A parlamentaria socialista Paloma Castro reclamoulle hoxe á conselleira de Política Social que realice unha auditoría sobre a situación das residencias de maiores e as vivendas comunitarias en Galicia logo dos alarmantes casos detectados en Xinzo e Amoeiro que derivaron no peche destes servizos e a intervención da Fiscalía. Así o dixo na comparecencia da conselleira de Política Social para presentar os orzamentos do seu departamento para 2026.

Castro emprazou á conselleira a auditar estes servizo para comprobar posibles incumprimentos no número de prazas, grao de dependencia dos usuarios, así como as súas condicións sanitarias e alimentarias, ademais da situación laboral dos traballadores e traballadoras que os atenden. Reclamou tamén o reforzo dos mecanismos de inspección, control e supervisión destes servizos para garantir a súa cobertura en toda Galicia.

A parlamentaria socialista trasladoulle esta petición á conselleira de Política Social na súa intervención para presentar as contas do próximo ano, que resultan “continuístas” e centradas unicamente nos “bonos e axudas puntuais” que supoñen unha “deriva asistencialista” contraria á universalidade dos dereitos sociais. Advertiu que os bonos “substitúen o dereito a un servizo estable por unha axuda temporal e arbitraria”.

A responsable socialista advertiu que a política social “vai a remolque da realidade galega” cuns orzamentos excesivamente centrados na “política do bono e da foto, no parche e na improvisación” mentres lles “fallan gravemente” a quen máis o necesita. Advertiu que as contas para o próximo ano carecen de visión estratéxica e de aposta polo servizo público, ademais de que “non hai compromiso real nin coa igualdade das persoas”.

Neste sentido, reclamou “políticas públicas que fagan da igualdade unha realidade e non un lema baleiro”, para garantir que Galicia “avance con decisión cara unha sociedade corresponsable, xusta e feminista”. Criticou o recorte dos fondos propios para casas de acollemento a menos da metade, ata uns escasos 149.000 euros que resultan “moi pouco”.

Paloma Castro resumiu que “non poden falar de reforzar os servizos sociais cando reducen as partidas, non poden falar de coidados e conciliación mentres recortan os programas que garanten tempo e dereitos para as mulleres, e non poden falar de loita contra a violencia de xénero cando deixan sen recursos ás casas de acollida e ás mulleres que máis o necesitan”.

Reclamoulle que “planifique, dialogue coas entidades locais e poña ás persoas no centro” porque “non queremos bonos, queremos dereitos, non queremos retórica, queremos feitos, e non queremos asistencialismo, queremos xustiza social”. Adiantou que os socialistas rexeitarán os Orzamentos de Política Social que “abandonan ás persoas máis vulnerables e seguiremos traballando por unha Galicia que garanta a igualdade, a dignidade e o benestar de todos e todas”.