Paloma Castro criticou que o PP perdese financiamento europeo para ese fin por importe dun millón de euros e incluso tivese que devolver os fondos xa adiantados

O Grupo Socialista acadou hoxe o apoio unánime do Parlamento galego para reclamarlle á Xunta unha vivenda destinada a vítimas de violencia machista con trastornos de adiccións. A portavoz socialista de Igualdade, Paloma Castro, defendeu unha iniciativa que tiña como obxectivo reverter “o fracaso e a neglixencia” do Goberno galego á hora de xestionar a construción dese inmoble, que estaba prevista no Porriño. Tal como recordou, o proxecto obtivo financiamento europeo, de fondos Next Generation, no marco do Plan “España te protege contra las violencias machistas”.

Porén, segundo denunciou, a “actitude á que nos ten acostumados a Xunta, que renuncia á xestión directa dos cartos e llos transfire a un concello, sen concorrencia e sen transparencia”, derivou no fracaso do proxecto. O Concello do Porriño foi incapaz de completar a adquisición dun inmoble e como resultado houbo que devolver preto dun millón de euros ao rematar, o pasado decembro, o prazo para a execución dos fondos. “Desde entón, en sete meses non sabemos nada máis”, dixo a parlamentaria do PSdeG.

Paloma Castro explicou en comisión que o 60 % das mulleres en tratamento por adiccións sufriron violencia de xénero, “unha cifra que algúns anos se eleva ata o 80 ou o 90 %”, matizou á vista dos datos do Plan Nacional sobre Drogas. De aí que os centros especializados para vítimas que conviven cunha adicción sexan “unha resposta imprescindible, urxente e xusta ante unha realidade moitas veces invisibilizada e silenciada”.

Trátase de ofrecer atención psicolóxica especializada, despregar programas de desintoxicación, facilitar protección e apoio legal e social e construír “espazos de coidado”, de modo que investir nese tipo de centros “é apostar pola vida e pola dignidade das mulleres”. Pero a actuación do Goberno galego respecto da construción desa tan necesaria vivenda “foi lamentable e dunha total neglixencia”, asegurou Castro para lembrar que en marzo de 2024 Rueda anunciou o proxecto, e en setembro, ao convenio de colaboración co Concello do Porriño para materializalo. Tres meses despois, en decembro, o alcalde devolveu os fondos “confiando en poder optar a outra subvención”. O importe dos fondos era de 999.736,60 euros, dos que xa se adiantaran o 80 %.

Castro valorou que todos os deputados e deputadas presentes na comisión apoiasen a demanda formulada polo Grupo Socialista para que o Goberno do PP impulse de novo a construción dunha vivenda para vítimas de violencia machista con trastornos de adicións, logo de que unha iniciativa no mesmo senso na Deputación de Pontevedra fose rexeitada polo Partido Popular.