Carmen R. Dacosta denuncia que “a improvisación substitúe á planificación e a inacción evidencia a falta de compromiso” por parte do PP, que deixa a Galicia “sen unha ferramenta fundamental contra os incendios”

A portavoz de Política Forestal do Grupo Socialista, Carmen Rodríguez Dacosta, vén de presentar no Parlamento unha batería de iniciativas para esixirlle á Xunta que desbloquee a tramitación da Lei Galega de Loita Integral contra os Incendios Forestais. A norma, que foi anunciada en 2021, leva bloqueada nos despachos da Xunta dende o remate do proceso de consulta pública, o 7 de xuño de 2023.

A responsable socialista sinala que a falla dunha nova Lei integral “é a demostración máis clara da falla de vontade política dun goberno máis preocupado pola propaganda que pola xestión real”. Criticou a falla de xestión nas labores preventivas por parte do goberno galego, no que “a improvisación substituíu á planificación, e a inacción deixou en evidencia a falta de compromiso do PP coa defensa do territorio e coa seguridade da cidadanía”.

Dacosta apuntou que o goberno galego tampouco fixo caso ao Plan Forestal de Galicia, que na última revisión alerta de que a Lei debera ter sido presentada como prazo máximo en 2025, “pero segue sen ver a luz”. Por iso advirte que o desleixo do PP dende o goberno galego provocou que Galicia “se tivera que enfrontar ao maior desafío ambiental, social e económico do medio rural sen unha ferramenta fundamental”

Esixiulle “explicacións e compromisos concretos” ao goberno galego, que “leva anos enganando á sociedade con anuncios baleiros” que derivaron na peor vaga de lumes do século, e lembrou que “está obrigado a cumprir dunha vez coas súas obrigas en materia de prevención e defensa contra os incendios forestais”, comezando pola presentación, antes de que remate este ano, do Proxecto de Lei galega de loita integral contra os incendios forestais.

Reclamou unha tramitación “transparente e participativa” na que incorporen as achegas de concellos, comunidades de montes, organizacións profesionais, o mundo académico, os colectivos sociais e os partidos políticos con representación parlamentaria. Ademais, deben incorporar un calendario vinculante para aplicar a norma, con medidas concretas en materia de prevención, ordenación forestal, profesionalización dos equipos e recuperación das zonas queimadas.

Ademais, a norma debe contar con orzamento estable e suficiente, así como recursos humanos e técnicos á altura da magnitude dos incendios, e garantir a súa coherencia co Plan Forestal para configurar un modelo integral real de xestión forestal e defensa contra incendios que deixe atrás a improvisación e a propaganda que caracterizan a acción da Xunta.