Lara Méndez reclama o reforzo dos recursos humanos e técnicos do órgano e urxe a aprobar un Plan estratéxico con obxectivos medibles

A portavoz de Comercio do Grupo Socialista, Lara Méndez, reclamoulle ao presidente da Comisión Galega da Competencia que aumente a acción “de oficio” do órgano diante da escasa iniciativa que teñen amosado estes anos. Así o dixo na comparecencia de Ignacio López – Chaves no Parlamento, na que lle reclamou que “non agarden a sentenzas ou á presión mediática” para actuar.

A responsable socialista propuxo que interveñan en sectores estruturais, como son o transporte público, as subministracións, sanidade ou contratación, porque Galicia “necesita dunha autoridade que vixíe de maneira permanente e multisectorial”. Reclamou que empreguen medios técnicos propios “para detectar abusos sen que cheguen ao ámbito xudicial” xa que “apenas aparecen novos expedientes actuando de oficio”.

Méndez reclamoulle un Plan estratéxico público con obxectivos medibles e o reforzo dos recursos humanos e técnicos que demostren unha aposta real co traballo deste órgano. Advertiu que a CGC está a amosar a “falla de difusión proactiva de informes e resolucións claves, o que merma o seu impacto social e disuasorio”, mentres conclúen os procesos con “sancións menores e menos procedementos iniciados que outras autoridades autonómicas e estatais”.

A parlamentaria socialista reclamou o reforzo dos mecanismos de independencia institucional, a mellora dos procesos internos para reducir os tempos de emisión de informes e reforzar a cooperación institucional para reforzar o potencial na busca de sinerxias coas universidades, concellos e asociacións de consumidores.