Aitor Bouza criticou que se trata dun problema “estrutural, non puntual ni illado”, e esixiu as explicacións que a conselleira “non lle deu ao Parlamento” a semana pasada

“Non só hai que pintar os recursos nos Presupostos; é necesario que se materialicen”, advertiu o deputado do PSdeG sobre “un dos principais problemas sociais de Galicia”

“Segundo os datos oficiais da propia Xunta, a execución orzamentaria do programa de acceso á vivenda era, a metade de ano, dun 5,1 %, é dicir, o 95 % dos fondos están pendentes de gastar”. Así explicou o deputado socialista Aitor Bouza a inacción do Goberno galego respecto do que constitúe “un drama social” para a comunidade autónoma e a primeira preocupación da cidadanía.

Bouza defendeu esta mañá unha proposición non de lei a través da que o Grupo Parlamentario do PSdeG lle esixe ao Executivo de Rueda que execute coa maior axilidade posible os fondos destinados a aceso á vivenda e presente na Cámara un plan que recolla as medidas que ten pensado aplicar nese eido ata final de ano, “con prazos, obxectivos e indicadores de seguimento”.

O parlamentario socialista cualificou de “incrible” que a Administración autonómica non sexa quen de mobilizar en medio ano máis que unha parte ínfima dos recursos. Alertou de que, por enriba, trátase dunha “cuestión estrutural, non puntual nin illada”. Por exemplo, no total do exercicio anterior, o de 2024, “só se executou o 30 %” dun programa “fundamental para a xente que agarda por unha vivenda”.

“É necesario determinar cales son as causas”, demandou Aitor Bouza. Reiterou, ademais, a petición de explicacións que a conselleira “non lle deu ao Parlamento” na súa comparecencia da semana pasada na Comisión de Orzamentos.

470 millóns de euros sen gastar

O deputado socialista fixo un repaso da situación da partida de acceso á vivenda durante a última década, na que, ano tras ano, se observa unha execución ínfima. “No 2017, un 41,3 por cento; no 2018, un ridículo 0,5 por cento; no 2019, un 13,9; no 2020, un 35.; no 2021, un 32; no 2022, un 8; no 2023, un 50; no 2024, un 30, e no 2025, un 5 por cento. En total, 470 millóns que deixaron de gastar”, enumerou. “Cando os van executar?”, preguntouse.

“O que ten que facer a comunidade autónoma, que ten as competencias exclusivas, é exercer esas competencias e non poñer escusas”, esixiu, e criticou que, mentres eses cartos non se destinan ao seu fin, “moitos mozos e mozas, miles e miles, están quedando fóra do bono alugueiro por esgotamento de crédito, porque a Xunta non achega fondos”.

Bouza censurou que as políticas de anuncios “a bombo e prato” por parte do Goberno de Rueda, “fachendeando de que presenta en prazo e forma os Orzamentos”, non serven de nada se programas coma o de acceso á vivenda “quedan ridiculamente executados ano tras ano”. “Non só hai que pintar os recursos nos Presupostos; é necesario que se executen as políticas públicas”, concluíu.