Julio Abalde censura a “campaña de propaganda” do conselleiro de Educación para “agochar o fracaso da xestión e o incumprimento dos obxectivos no ensino público”

Lamenta que persista na “neutralidade ideolóxica” que “non é mais que un eufemismo para tapar a súa desconfianza no profesorado e o desenvolvemento do coñecemento crítico no alumnado”

O portavoz de Educación do Grupo Socialista, Julio Abalde, alertou de que a unha semana de que comece o curso escolar, os centros descoñecen a dispoñibilidade de profesorado de reforzo e os desdobres de aulas que necesitan. O responsable socialista considera “intolerable” que o goberno do PP estea a escatimarlle información á comunidade educativa, que ten que agardar ao inicio do curso para coñecer as condicións reais.

Abalde lembrou que o 12 por cento do alumnado escolarizado en Galicia ten necesidades de reforzo educativo, pero os centros descoñecen a día de hoxe se van recibir ou non ao profesorado de Pedagoxía  Terapéutica, Audición e Linguaxe e de apoio que teñen solicitado. Criticou que a Consellería sexa “cicateira” co ensino público, evitando un ano máis o reforzo do profesorado, ademais de eludir os desdobres comprometidos pola ponderación destes alumnos e alumnas.

O responsable socialista apuntou tamén que a redución de parte dos gastos de material escolar no IRPF para as familias que non acaden apoio nos libros de texto supón “parches para non recoñecer o erro de ter suprimido a gratuidade universal dos libros de texto e do material escolar”. Ademais, o paso atrás na implantación das novas tecnoloxías a través do E-Dixgal evidencia o “fracaso” do “modelo estrela” do PP.

Ademais, advertiu que en FP “seguimos á espera de que a Xunta explique como vai desenvolver a nova Lei de FP, que debera aproveitar fondos estatais pero que a Consellería “non parece interesada en aproveitar”. Lamentou que un ano máis teñan renunciado a mellorar a calidade educativa cun aumento de recursos e “sobre todo de apoio para ter un salto de calidade significativo”.

Neutralidade ideolóxica

O responsable socialista lamentou a “insistencia pertinaz” do conselleiro na imposición da “neutralidade ideolóxica” nas aulas, que “emprega un eufemismo para o que non é máis que a desconfianza no profesorado e no desenvolvemento do coñecemento crítico no alumnado”. Afeoulle que “digan reforzar a consideración do profesorado cando en realidade desconfían do seu criterio para formar ao alumnado”.

O responsable socialista criticou a “campaña de propaganda” despregada polo conselleiro de Educación nos últimos días para agochar o “fracaso e incumprimento dos seus propios obxectivos e promesas” no ensino público detrás dun “catálogo de supostas novidades e propostas”. Dixo que o conselleiro presenta “moito anuncio e moito programa que non supón unha mellora efectiva da calidade educativa, das infraestruturas nin dos recursos humanos dos centros”.