Silvia Longueira advertiu que o concerto co Goberno galego, do que dependen 5.188 prazas de usuarias e usuarios, non cubre o incremento recollido no convenio colectivo do persoal

Criticou o grave problema de endebedamento que o Executivo autonómico lles está a causar a unhas organizacións que ofrecen servizos “que debera levar a cabo a Xunta” 

A portavoz socialista de Política Social no Parlamento galego, Silvia Longueira, alertou hoxe do grave problema que a Xunta lles está a xerar ás entidades de atención á discapacidade ao non cubrir o incremento de gastos que supón a actualización dos convenios colectivos do persoal. A deputada do PSdeG sinalou que 88 organizacións, que se fan cargo de 5.188 prazas concertadas, viven unha situación límite, en moitos casos mesmo “obrigadas a subscribir liñas de crédito” para sobrevivir.

Longueira explicou que, aínda que o problema de infrafinanciamento vén de máis atrás, desde xaneiro deste ano os elevados custes salariais están levando a un maior endebedamento das entidades, xa que o Goberno galego non regulariza ese incremento no concerto social que ten subscrito con elas. “Non é un concurso de licitación gañado por concorrencia”, lembrou a parlamentaria socialista, que insistiu en que teñen que facer fronte “por lei” ás subidas no convenio “de todo o persoal”, e non só do dedicado a atención.

“Traballan con persoal de atención directa, pero tamén con outro sen o que non poderían levar a cabo a prestación do servizo, como é lóxico: limpeza, administración, cociña…”, advertiu Silvia Longueira para reclamarlle ao Executivo galego que poña solución ao problema “e garanta a sustentabilidade económica destas entidades sen ánimo de lucro”.

Sinalou, ademais, que esas organizacións “están prestando o servizo que debera levar a cabo a Xunta”, polo que debe cubrir os gastos do mesmo xeito que fai no caso dos centros que xestiona a propia Administración galega.