Patricia Iglesias acusa a Rueda de facer “seguidismo absoluto” a Feijóo na súa oposición “sen ideas, sen dirección e sen escrúpulos”

A portavoz de Economía do Grupo Socialista, Patricia Iglesias, acusou ao goberno galego de ir contra o sector económico galego ao opoñerse ao Plan de rescate de 14.000 millóns de euros presentado polo goberno de Pedro Sánchez fronte á política arancelaria de Trump. Iglesias presentou unha Interpelación no Pleno do Parlamento na que advertiu que o “seguidismo absoluto” de Rueda á oposición “sen ideas, sen dirección e sen escrúpulos” de Fejióo está a prexudicar a Galicia.

A responsable socialista criticou que a oposición do PP ao goberno do Estado na guerra arancelaria aberta por Trum constitúe un “erro político e irresponsabilidade histórica” que se traduce en “darlle as costas a Galicia” para “poñerse do lado da extrema dereita”. Criticou que fagan seguidismo no intento de “boicotear por razóns partidistas” un Plan que supón 14.000 millóns de euros de investimento na súa obsesión por “destruír e confrontar” calquera iniciativa do goberno.

Co seu voto, explicou, van en contra das “nosas adegas do Ribeiro, da Ribeira Sacra e das Rías Baixas, que perden contratos, deixan de exportar e viron como lles pechaban as portas dun dos seus principais mercados”. O mesmo sucede coas conserveiras galegas, que “tiveron que renegociar prezos, frear investimentos e paralizar expansións”, ou do sector lácteo e os produtos agroalimentarios, que “viron desaparecer oportunidades no mercado gourmet estadounidense”.

Criticou a ausencia dun Plan específico de resposta por parte do goberno galego, que ademais de negar as axudas estatais renunciaron a poñer enriba da mesa axudas directas específicas para os sectores galegos afectados. Dixo que Galicia “non pode seguir sendo a excepción” pola “pasividade institucional” e a “pouca ambición” dun goberno que prefire “mirar para outro lado” mentres gobernos como Cataluña, A Rioxa ou Andalucía aprobaron medidas compensatorias e axudas directas.

Subliñou que “a política non pode ser unha trincheira, senón unha ponte” cando Galicia “necesita apoio, investimento e coherencia” fronte aos “vetos e bloqueos” que ofrece o seu goberno por seguir ao PP de Feijóo “en contra dos gandeiros do Deza, das adegas galegas, das conserveiras de Bueu e Ribeira e dos traballadores da industria transformadora”.