Carmen R. Dacosta esixe a apertura dun expediente informativo sobre as derivacións a centros privados, unha auditoría independente sobre os servizos destes centros e tomar medidas sancionadoras contra estas prácticas

A parlamentaria socialista Carmen Rodríguez Dacosta vén de presentar no Parlamento unha batería de iniciativas logo da denuncia presentada pola Fiscalía de Ourense por presunta estafa do Centro Médico El Carmen na prestación de servizos a pacientes derivados polo Sergas. Dacosta critica a falla de control da Xunta, que leva anos “mirando para outro lado” nas derivacións á privada.

A responsable socialista esixe “esclarecer responsabilidades, avaliar o alcance real dos feitos e garantir a legalidade, transparencia e eficiencia na xestión dos recursos públicos” diante dun modelo de derivación á sanidade privada que “leva anos funcionando con importantes deficiencias en materia de control, supervisión e garantías”.

Así o sinalou o propio Consello de Contas no informe de fiscalización de 2024. Aquela, o ente fiscalizador alertada do uso excesivo de mecanismos alleos aos procedementos ordinarios de contratación pública e da existencia de “debilidades estruturais no sistema de control”.

O Grupo Socialista reclámalle ao goberno galego que abra de inmediato un expediente informativo sobre o conxunto das derivacións a centros privados na área sanitaria de Ourense, Verín e O Barco de Valdeorras para detectar posibles novas irregularidades na facturación, o control das prestacións e a aplicación das tarifas.

Ademais, reclama unha auditoría independente sobre os servizos prestados por centros privados con cargo ao Sergas nesta área sanitaria para garantir que estiveran cobrando correctamente. Finalmente, reclama que tomen as medidas administrativas e sancionadoras que sexan necesarias en función das conclusións do expediente e a auditoría, incluíndo “a revisión, suspensión ou mesmo a extinción das autorizacións de uso”.

A responsable socialista presentou estas iniciativas logo de coñecer a denuncia presentada pola Fiscalía Provincial de Ourense contra aquel centro médico, que pertence ao Grupo Recoletas Salud, por facturar intervencións realizadas con sedación cando en realidade estaban aplicando anestesia local, o que suporía aplicar facturas superiores ás correspondentes.