O portavoz do Grupo Socialista denuncia “a falacia fiscal do PP”, que baixa en 500€ os impostos aos 38.000 galegos que cobran máis de 100.000 euros anuais, e só 12€ aos 800.000 galegos con rendas baixas e medias

Caballero sinala que, fronte á do PP, a política fiscal socialista prioriza a modernización económica, as políticas de benestar social e igualdade e a xeración de emprego de calidade

Begoña Rodríguez Rumbo critica que a Xunta presente “unhas contas ordinarias para unha situación extraordinaria”

O portavoz do Grupo Parlamentario Socialista, Gonzalo Caballero, alertou hoxe de que os orzamentos da Xunta para 2022 constitúen “unha oportunidade perdida” á hora de aproveitar os fondos extraordinarios para afrontar a recuperación económica de Galicia postcovid.

Así o dixo na súa intervención no debate final dos Orzamentos da Xunta para o próximo ano, que foron aprobados co único voto favorable do PP, e no que o PP non aceptou ningunha das 491 propostas de modificación de gasto do PSdeG presentadas polo Grupo Socialista.

Gonzalo Caballero sinalou que os orzamentos “non están á altura do que os galegos e as galegas necesitan”, por canto constitúen un mero “documento contable” sen estratexia de país, nin modelo para a recuperación, nin política económica: “usan  un traxe keynesiano expansivo baseado nas partidas procedentes do Estado e da UE pero o PP fai perder unha oportunidade a Galicia”. Caballero evidenciou que “fracasan na modernización económica, na defensa do benestar e no impulso á xeración de emprego” e amosan a un PP que desdeña o diálogo e o acordo, “ensimismado na súa maioría”.

Foron elaborados e aprobados, dixo o dirixente socialista, “sen diálogo, sen proxecto de país e sen compromiso suficiente co estado do benestar e cos servizos públicos”. Son unhas contas, afondou, que “carecen de impulso para apoiar ao tecido produtivo e a modernización” económica, que representan a un PP e un Feijóo que “desconfían das políticas de igualdade”, que obvian as necesidades da mocidade e da memoria democrática e que non dan respostas para a política industrial e o medio rural.

Do mesmo xeito, sinalou que “o PP mantense na inercia, nos brazos caídos, nas herdanzas das políticas neoliberais” que demostran que o goberno galego “descoñece como xestionar tal cantidade de fondos públicos” procedentes da UE e do Estado para a recuperación económica. Dixo que as contas aprobadas hoxe “son os orzamentos da dereita e do PP”, pero “non son os orzamentos que os galegos e galegas necesitamos para a Galicia poscovid”.

Sobre todo, incidiu o voceiro socialista, porque estas contas fracasan á hora de “modernizar a economía, fortalecer o benestar e xerar emprego”, e sinalou que “hoxe os galegos e as galegas sabemos que o PP non nos dá novas esperanzas e novas oportunidades para o seu futuro”.

“A FALACIA FISCAL DO PP”

Ademais, Gonzalo Caballero criticou que, mentres as contas presentadas polo goberno galego renuncian a establecer as prioridades para a recuperación e carecen de modelo de reactivación, si incrementan nun 6 por cento as partidas para persoal de confianza mentres despiden 868 profesores de reforzo e máis de 500 profesionais sanitarios en plena pandemia.

En paralelo, reprobou a “falacia fiscal do PP”, que anuncia unha rebaixa de impostos que en realidade só afecta aos 38.000 galegos e galegas que cobran máis de 100.000 euros anuais, aos que lles rebaixan 500 euros de impostos, mentres aos 800.000 galegos e galegas de rendas baixas redúcenlles 12 euros ao ano. Censurou esta “alianza cos millonarios” mentres se recortan os servizos públicos.

Gonzalo Caballero alertou de que o goberno galego “ten que estar sempre pendente e actualizar os orzamentos e as medidas para unha Galicia que segue sufrindo día a día as consecuencias do virus”, nun contexto no que a sanidade resulta “fundamental para afrontar a reactivación económica”.

CONTAS ORDINARIAS PARA UNHA SITUACIÓN EXTRAORDINARIA

A voceira de Orzamentos do grupo Socialista, Begoña Rodríguez Rumbo, denunciou pola súa banda que os orzamentos da Xunta de Galicia para o vindeiro ano son unas “contas ordinarias para una situación extraordinaria”, como é a derivada da crise económica e social da covid. Rodríguez Rumbo interveu no debate das 72 emendas ao articulado, mentres Caballero fixo o propio coas 492 emendas ao Estado de gastos.

Rodríguez Rumbo afirmou que o goberno galego presenta “uns orzamentos con moita propaganda, pero que non empregan todos os recursos ao seu alcance para atender ás necesidades das persoas e dos sectores económicos para reforzar o estado de benestar e saír sen desigualdades da crise”.

Así, evidenciou que “carecen de proxectos adaptados ás novas circunstancias” e son “una oportunidade perdida que non aproveitan os fondos adicionais que chegan da Unión Europea e do Estado”. Advertiu, en conclusión, que “non poñen as bases para o cambio do modelo produtivo galego para avanzar cara un país máis cohesionado, máis verde e máis feminista”.

Begoña Rodríguez Rumbo denunciou que o PP só aceptou transaccionar 2 das 563 emendas -o 0,3 por cento- presentadas polo PSdeG, coas que querían mobilizar 466 millóns de euros para “reforzar as políticas públicas prioritarias”. Por contra, incidiu en que, co seu voto en contra ás emendas socialistas, o PP retrátase e elixe “continuísmo con receitas que xa se amosaron fracasadas”.

Como exemplos máis notorios disto,  Begoña Rodríguez Rumbo censurou que o Partido Popular vote en contra de incrementar en 115 millóns de euros a dotación para a sanidade o pública ou a  súa negativa a incrementar en 79 millóns de euros para educación, malia que o goberno fala dos maiores recursos para familias nese eido, un dos principais expoñentes de “cinismo” da Xunta.

“O mesmo acontece”, resaltou a deputada socialista, “coas políticas sociais”, onde o PP veta, ao aumento de 46 millóns de euros que propón o PSdeG. Isto implica, entre outras cousas, votar non a que se estableza un Plan de loita contra a pobreza nun escenario no que existen 600.000 galegos e galegas pobres. Trátase “dunha mostra máis de que para vostedes as políticas redistributivas que contribúan a diminuír as desigualdades son ciencia-ficción”.

Ao mesmo tempo, advertiu de que as contas da Xunta “volven ningunear aos concellos” cun financiamento que “segue nos mesmos niveis de hai 12 anos” e que “abandona “ aos municipios sen achegarlle, como reclamaba o Grupo Socialista, “ningún recurso para que poidan atender as novas necesidades xurdidas pola covid”.

Finalmente, Begoña Rodríguez Rumbo puxo o acento na “preocupante situación demográfica do noso país”, un contexto no que o PP veta un incremento do 25 por cento nas partidas para a conciliación da vida laboral e familiar ou permite que baixe en 43 millóns de euros a dotación en fomento do emprego.