O secretario xeral critica que Feijóo “leva meses” sen convocar ao órgano de coordinación co Goberno e os concellos galegos para coordinar os traballos fronte á covid
Santiago, 20 de decembro de 2020. O secretario xeral do PSdeG, Gonzalo Caballero, denunciou hoxe “unha nova improvisación” de Feijóo no que atinxe á loita contra a pandemia ao convocar dous días antes do Nadal ás policías locais das cidades e “saltándose aos alcaldes”.
Sobre todo, como dixo o líder do PSdeG, porque Feijóo leva meses sen convocar á CECOP, o órgano de coordinación de Galicia co Goberno e os concellos galegos para coordinar os traballos fronte á covid.
“Agora Feijóo atópase con que non ten os deberes feitos para o Nadal”, sinalou Gonzalo Caballero, quen fixo fincapé na crítica en que Feijóo convoque ás policías locais e “non aos alcaldes, que son os responsables” deses corpos.
“Feijóo ten que cumprir coas súas obrigas e reunirse cos alcaldes e alcaldesas para coordinar o cumprimento das normas no Nadal”, incidiu o máximo dirixente do PSdeG: “todos estamos moi preocupados, e Feijóo non pode seguir ausente”.
Neste contexto, Gonzalo Caballero pediu “responsabilidade e cooperación de todas as administracións, comezando pola Xunta”, e chamou tamén “á prudencia e á sensatez ao conxunto da cidadanía” na batalla contra o virus tamén no Nadal. Ademais, volveu ofrecer a Feijóo a man do PSdeG para loitar contra a pandemia.