O líder do PSdeG subliña que “Galicia non pode ser un eucaliptal” pero advirte de que “a mala planificación” da Xunta é “perversa” con concellos como A Fonsagrada e Castroverde
O dirixente socialista chama a todas as forzas da Fonsagrada a aprobar os orzamentos locais nun momento no que “o prioritario” é facer fronte á crise
O secretario xeral do PSdeG, Gonzalo Caballero, visitou hoxe A Fonsagrada xunto co alcalde, Carlos López, e o rexedor de Castroverde, Xosé María Arias, para denunciar o “abandono” do medio rural por parte da Xunta.
Acompañado tamén pola secretario de Organización do PSdeG, José Antonio Quiroga; a secretaria provincial do PSdeG de Lugo, Patricia Otero, e o voceiro socialista de Medio Rural, Martín Seco, Gonzalo Caballero puxo o foco en que cada vez son máis os alcaldes de pequenos concellos que están pedindo a dimisión do conselleiro de Medio Rural.
En concreto, na provincia de Lugo, incluso alcaldes do PP, como o de Friol, ergueron a voz para denunciar a “ineficiencia” das políticas da Xunta en materia de medio rural e para reclamar a Feijóo un cambio á fronte deste departamento.
“Xa hai alcaldes do PP e do PSdeG que reclaman a dimisión do conselleiro”, incidiu o dirixente socialista, quen defendeu outra política para os pequenos concellos e unha estratexia de “discriminación positiva” encamiñada a dar “igualdade de oportunidades” a toda a cidadanía, independientemente do lugar onde vivan.
PLANIFICACIÓN FORESTAL
Ao fío disto, en compañía dos alcaldes da Fonsagrada e Castroverde, Gonzalo Caballero analizou a problemática derivada da ausencia de xestión forestal da Xunta.
En concreto, o líder do PSdeG denunciou que existe “unha mala planificación” por parte do goberno galego e que esta ten efectos “perversos” para concellos como A Fonsagrada ou Castroverde.
“Galicia non pode ser un eucaliptal”, deixou claro Gonzalo Caballero, antes de esixir á Xunta que busque o consenso para ordenar e equilibrar as plantacións. “Non ten sentido que haxa zonas de Galicia masificadas cun 90% de eucaliptos e que noutras estea completamente prohibido”, apuntou.
Fronte a isto, o máximo responsable do PSdeG subliñou que “cómpre ordenar” o solo e equilibrar as plantacións por zonas a través dunha planificación que “evite o monocultivo” e estableza rotacións para evitar afondar na degradación do solo.
Así mesmo, Gonzalo Caballero avogou por que as plantacións de eucaliptos vaian acompañadas de compensacións para as zonas de frondosas autóctonas, de xeito que se poidan equilibrar os beneficios do monte en produción e do monte de protección ambiental.
ORZAMENTOS DA FONSAGRADA
En paralelo, o secretario xeral do PSdeG apelou ao resto de forzas con representación no concello da Fonsagrada para que apoien a aprobación dos orzamentos locais.
“O prioritario é sacar adiante as contas para enfrontar a crise que estamos vivindo sen deixar a ninguén atrás”, subliñou Gonzalo Caballero.