O voceiro socialista chama a Feijóo a “comparecer regularmente” na Cámara ante a “improvisación, inconsistencia e debilidades” fronte á covid e tende a man do PSdeG “para sacar Galicia adiante”

O secretario xeral reproba a Feijóo por “perder moito tempo” en confrontar co goberno de España a conta do estado de alarma en vez de fortalecer a sanidade, as residencias e a economía: “O de Ayuso non é o modelo que queremos para Galicia”

O portavoz do Grupo Socialista, Gonzalo Caballero, esixiulle hoxe a Feijóo que fortaleza o sistema de rastrexadores e que se faga “o máximo” de PCR que sexan posibles, á vista da caída rexistrada no número de probas deste tipo. Ademais, urxiu a que se concreten as axudas directas aos sectores afectados, porque logo do peche da hostalería en 60 concellos, “a día hoxe ningún hostaleiro recibiu un euro da Xunta”.

Ao fío disto, o responsable socialista denunciou a “política de oscurantismo” do presidente da Xunta, que fixo do número de rastrexadores a súa particular “fake news” como confirmou o conselleiro de Sanidade ao negarse a confirmar a existencia dos 6.152 rastrexadores anunciados por Feijóo.

A realidade, dixo Gonzalo Caballero, é que “Galicia ten os peores datos de rastrexadores do Estado”, co que en dous terzos dos positivos non se coñece a orixe dos contaxios. Por iso, esixiu o compromiso do presidente da Xunta de facer público o dato real de rastrexadores e que “nunca se fagan menos PCR das que sexa posible”.

Ademais, criticou a xestión do goberno galego coa campaña de vacinación da gripe deste inverno, dado que a falla de previsión da Xunta provocou a súa paralización temporal por falla de dosis e o aprazamento de vacinacións xa programadas no Sergas.

En paralelo, o dirixente socialista incidiu na falla de medidas de blindaxe nas residencias de maiores, máxime á vista do número de casos de contaxios masivos, e reclamou unha investigación sobre o que está sucedendo no xeriátrico de Salvaterra.

“SEN RUMBO”

Así mesmo, o líder do PSdeG fixo fincapé na “ausencia” de axudas directas por parte da Xunta a sectores como a hostalería, a cultura, o comercio ou o turismo, como proba o feito de que hoxe mesmo houbo fronte á Xunta unha manifestación dos hostaleiros.

A iso engadiu “a falla de rumbo e de estratexia” que se aprecia tamén na orientación a medio e longo prazo no eido económico, tamén no que atinxe aos proxectos europeos. “Hai que deseñalos a través dun gran acordo do país”, remarcou.

“MAN TENDIDA”

O líder dos socialistas galegos comprometeu a “man tendida” do PSdeG na xestión da pandemia “a pesares dunha xestión difícil de entender”, que evidencia a “improvisación, inconsistencia e as debilidades da Xunta fronte á covid”. E chamou á corresponsabilidade do presidente da Xunta, a quen lle esixiu que compareza “regularmente” na Cámara autonómica.

Gonzalo Caballero lembrou que o presidente da Xunta tan só compareceu diante do Parlamento en dúas ocasións dende o comezo da pandemia, a última o pasado 7 de maio, e sinalou que “non lle pode dar as costas” á Cámara autonómica. Reclamoulle que explique “as súas decisións en sanidade, educación, economía ou política social” con diálogo e facendo transparente a “folla de traballo” do goberno galego.

Ademais, reprobou que Feijóo “perdeu moito tempo” en confrontar co goberno de España a conta do estado de alarma, en lugar de ocuparse de preparar á sanidade, ás residencias ou a economía fronte á chegada da segunda onda da covid. Lembrou a “improvisación e a viraxe” do presidente da Xunta, que pasou de pedir en maio a mesma descentralización de competencias que agora critica, ou de rexeitar a blindaxe da comunidade a pechar 60 concellos e a hostalería en seis días.

“O de de Ayuso non é o modelo que queremos para Galicia”, advertiu Gonzalo Caballero a Feijóo antes de lembrar a “inconsistencia” de que sexa posible visitar Cedeira ou Baiona dende Madrid pero non dende Coruña ou Vigo.