O secretario xeral do PSdeG intervén na ofrenda floral no Panteón de Galegos Ilustres en conmemoración do plebiscito Estatuto de 1936

Empraza ao resto de forzas políticas a facer unha reforma do Estatuto para dotar de novos mecanismos ao goberno galego

27 de xuño de 2023. O secretario xeral do PSdeG, Valentín González Formoso, chamou á sociedade galega a acudir nas urnas para dar unha resposta contundente a unha extrema dereita que ameaza con acabar coa autonomía “baixo amparo da dereita que se dicía moderada”. Fixo estas declaracións no transcurso da ofrenda floral dos socialistas galegos a Castelao no Panteón de Galegos Ilustres en conmemoración do plebiscito do Estatuto de 1936.

Este é un acto que para Formoso “cobra un valor especial” a propósito da actualidade política, xa que ven importante “falar de estatutos de autonomía e de competencias” nun momento onde a “extrema dereita e a dereita avanzan cara un posible goberno”.

No discurso que realizou despois de realizar a ofrenda a Castelao, apuntou que “temos que ter claro que en ningún lugar está escrito que a autonomía, que o autogoberno, se instalara para sempre”. Fixo esta apreciación porque entende que “vivimos uns tempos convulsos, nos que afloran opcións políticas herdeiras daquelas que acabaron coa democracia, e cuxo programa consiste en limitar liberdades, en recortar dereitos e en derrubar todo o que logramos como pobo”, alegou.

Pero Formoso destacou como “aínda máis perigoso” que estas “opcións extremas e radicais atopen un amparo entusiasta na dereita política que se dicía moderada, e que en realidade sempre renegou do desenvolvemento do autogoberno”, sendo para el a proba disto que “nos últimos 15 anos Galicia non fora quen de sumar unha nova competencia”, apuntou.

A CIDADANÍA VAI TER QUE ESCOLLER

Nas declaracións aos medios, sinalou que os socialistas “estamos a ver con horror” como nas vindeiras eleccións “a cidadanía vai ter que escoller” entre dous modelos de país. Entende que dende o seu partido defenden un proxecto dunha Galicia “que é un país moderno, que consolide dereitos sociais, laborais e económicos, un proxecto europeísta”.

Fronte a isto, destacou que hai un proxecto de Galicia “en branco e negro, onde se volven a conxurar principios que van contra dereitos e liberdades das mulleres, contra a diversidade en calquera aspecto da vida, volver a unha cultura capada e volver a non respectar a pluralidade nacional”, alegou Formoso.

Na mesma liña, deu un carácter destacado a uns comicios que “non son unhas eleccións máis”, senón que “nos xogamos algo moito máis serio, volver 40 anos atrás, unha España e unha Galicia en branco e negro ante unha extrema dereita que está poñendo nas institución a persoas antiabortistas, anticultura, antieuropa e antiliberdade”. Porque “está en risco todo isto”, Formoso fixo un chamamento á sociedade galega a que demostre o 23 de xullo que é “de progreso, moderna e europeísta”.

REFORMA DO ESTATUTO

O secretario xeral do PSdeG fixo unha proposta significativa no seu discurso diante da cripta de Castelao, emprazando a todas as forzas políticas con representación no Parlamento a reunirse para facer unha actualización do Estatuto de Autonomía de 1981 en materias clave, asumindo o seu partido “de novo un papel protagonista” que tiveron na conformación do Estatuto do 36.

Formoso ve “inconcibible” que outras comunidades autónomas que non están consideradas como unha nacionalidade histórica teñan a posibilidade de facer decretos-lei para poder xestionar con máis axilidade. Do mesmo xeito, non comprende que outros territorios como Andalucía ou Canarias “poidan asumir a xestión e ordenación do seu litoral”, mentres que en Galicia “a falta de previsión estatutaria sexa utilizada como obxección para non acceder a esta competencia”.