Alerta dos “graves custes sociais, económicos e humanos” provocados polo desmantelamento das unidades

A portavoz de Sanidade do Grupo Socialista, Elena Espinosa, acusou hoxe á Xunta de “deixar abandonados” aos enfermos con covid persistente -entre o 10 e o 20 por cento das persoas que se contaxiaron do virus- ao desmantelar as unidades multidisciplinares que os atendían en Galicia. Espinosa presentou unha proposta no Pleno do Parlamento para reclamar a reapertura das unidades, a formación específica do persoal e protocolos específicos  e censos de doentes.

A proposta, que será votada na sesión de mañá mércores, busca salvar o “baleiro asistencial” ao que o goberno galego está a condenar a centos de pacientes en toda Galicia, aos que lles nega recursos específicos e os condena a unha “longa peregrinaxe por distintos especialistas”. Reclamoulle ao Sergas que reconsidere a súa decisión de desmantelar as unidades que, advertiu, “suporá custes sociais, económicos e humanos moito maiores o día de mañá”.

Estas unidades, creadas entre 2020 e 2021 en varios hospitais galegos, foron pechadas gradualmente ata que, este mesmo ano, o goberno galego tomaba a decisión de desmantelar a última delas, que resistía en Ourense, malia que disfrazado baixo o eufemismo da “reorganización”.

Espinosa presentou testemuñas reais de doentes de covid persistente, que logo do peche da unidade teñen que enfrontarse a un sistema que non está preparado para a súa situación, con persoal que descoñece a sintomatoloxía e meses de espera entre cada proba. Estes denuncian que a calidade na asistencia ten diminuído drasticamente, a seguridade como pacientes está “en dúbida” e a eficiencia na atención, seguimento e coidados “vese comprometida”.

Explicou que estes pacientes presentan ata 200 síntomas diferentes, entre eles dores, astenia ou fallos da memoria, e ven afectados tódolos sistemas orgánicos, o cardiovascular, o nervioso, o endócrino, o inmunolóxico, o reprodutivo ou o gastro intestinal, o que require dunha atención multidisciplinar específica que o goberno galego lles está a negar.