A parlamentaria socialista esixe “que ninguén quede atrás” na atención a unha “necesidade social evidente” para as persoas maiores e dependentes

A parlamentaria socialista Carmen Rodríguez Dacosta reclamoulle hoxe á Xunta que amplíe de urxencia as prazas do programa Xantar na Casa de Ourense ata 100 prazas e que garanta atención inmediata para as 9 persoas en lista de agarda. Dacosta presentou unha pregunta oral na Comisión de Política Social do Parlamento na que advertiu que “hai base legal e hai unha necesidade social evidente” para un servizo fundamental para persoas maiores e dependentes.

A responsable socialista explicou que o programa desenvolto en base a un convenio entre o Concello e a Xunta, ten actualmente 62 prazas, poderá ser ampliado engadindo unha addenda para ampliar o número de persoas atendidas co orzamento necesario. Reclamoulle ao goberno galego que demostre “estar á altura” atendendo canto antes á petición unánime dos grupos con presenza no Concello para ampliar ata 100 as prazas do programa.

Carmen R. Dacosta reclamou que garantan a atención a esas 9 persoas maiores ou dependentes que necesitan incorporarse ao programa “co compromiso explícito de non volver pechar por falta de prazas”. Ademais, reclamou unha campaña de difusión rigorosa e sostida, en coordinación cos concellos, cos centros de saúde e co terceiro sector, porque “se a información non chega, o dereito non existe”.

Advertiu que “non abondan cos anuncios”, senón que deben responder cun compromiso político que se concrete en “prazos e cifras”, e subliñou que as “escusas e evasivas” por parte do goberno galego ata hoxe “xeran frustración e indignación”.

Dacosta lembrou que este programa sucedeu ao Comedor sobre Rodas posto en marcha polo goberno local presidido polo PSOE entre 2007 e 2012, que se converteu nun referente de innovación social municipal pero que Jácome decidiu “botar por terra e desmantelalo”.

Sen embargo, tivo que recuperalo como Xantar na Casa para atender a un “servizo básico que garante unha alimentación equilibrada que garante autonomía e seguridade aos usuarios e constitúe unha peza chave das políticas de coidados de proximidade en Galicia”, e que agora está a pedir a súa ampliación. Reclamoulle así ao goberno galego que garanta “dereitos, dignidade e responsabilidade institucional” para solucionar unha necesidade real dos galegos e galegas.