O secretario xeral do PSdeG, que apoiou a manifestación do Foro Cidadán, avogou por un novo trazado que conecte Ferrol e A Coruña en 30–35 minutos “porque non chega con resistir, hai que avanzar”

Criticou directamente ao presidente da Xunta: “Rueda non ten a Ferrolterra nas súas prioridades. A comarca está abandonada polo Partido Popular e xa vai sendo hora de que se poñan as pilas”, advertiu

Avanzou que o PSdeG xa traballa para que o Goberno de España incorpore nos próximos Orzamentos Xerais unha partida para o novo trazado ferroviario: “Os socialistas facemos a nosa parte. Agora queda por ver se o PP votará a favor destes orzamentos ou volverá poñerse de costas á comarca”

O secretario xeral do PSdeG, José Ramón Gómez Besteiro, participou este mediodía na manifestación convocada polo Foro Cidadán polo Ferrocarril en Ferrol para reclamar un servizo ferroviario “digno, público e sostible” para as comarcas de Ferrolterra, Eume e Ortegal. Besteiro apoiou unha mobilización “xusta, seria e necesaria” que leva un ano articulando a milleiros de veciños na defensa dun dereito básico: a comunicación.

Besteiro lembrou que o Partido Socialista “foi quen sacou a Ferrolterra da crise industrial”, pero advertiu de que “non chega con resistir; hai que avanzar”. Por iso situou como prioridade “unha nova conexión ferroviaria entre Ferrol e A Coruña que permita viaxar en media hora, entre 30 e 35 minutos, con un trazado novo, competitivo e pensado para o futuro”.

O líder socialista valorou “calquera mellora no trazado actual”, mais subliñou que “non son suficientes” e que Galicia non pode seguir ancorada en solucións de fai décadas. “Falamos dunha área que atende a preto de medio millón de galegos e galegas. Esta comarca merece ambición”, indicou.

Incorporou unha crítica directa ao presidente da Xunta. “Rueda non ten a Ferrolterra nas súas prioridades. A comarca está abandonada polo Partido Popular e xa vai sendo hora de que se poñan as pilas”, advertiu. Lembrou que “o transporte por estrada é a mellor proba”: “non hai planificación, non hai investimentos e non hai servizo; hai liñas masificadas, frecuencias insuficientes e autobuses que non chegan”.

Ademais, avanzou que o PSdeG xa traballa para que o Goberno de España incorpore nos próximos Orzamentos Xerais unha partida específica para o novo trazado ferroviario que defende a cidadanía de Ferrolterra e que hoxe reclamaron centos de persoas na rúa. “Os socialistas facemos a nosa parte. Agora queda por ver se o PP votará a favor destes orzamentos ou volverá poñerse de costas á comarca”, sinalou.

O secretario xeral insistiu en que os socialistas “sempre estivemos do lado das solucións” e avanzou que esta reivindicación non remata hoxe. “O que pedimos é claro: melloras inmediatas no servizo actual e un trazado novo que conecte Ferrol coa Coruña e coa alta velocidade. Este é o camiño se queremos que Ferrolterra deixe de esperar polos trens do futuro”.

A mobilización contou tamén coa presenza de numerosos cargos do PSdeG, desde representantes municipais ata responsables orgánicos da comarca e da provincia, unha participación que expresa a relevancia estratéxica de Ferrolterra para o proxecto socialista en Galicia e o compromiso colectivo por abrir unha nova etapa nas infraestruturas e na mobilidade da zona.