Categorías: Actualidade

Besteiro denuncia en Porto do Son que mentres se despilfarraron 470 millóns no Cunqueiro para beneficiar ao sector privado, para Rueda a atención primaria “parece ser secundaria ou terciaria”

O secretario xeral do PSdeG asistiu á concentración en defensa da sanidade pública ante o centro de saúde sonense xunto ao deputado autonómico Julio Abalde e cargos socialistas da comarca de Noia

“A sanidade pública é un ben a preservar e protexer, non é un fondo que esquilmar”, asegurou o líder socialista, que insistiu nun plan de choque para contratar persoal, deixar de pechar ambulatorios e investir na mellora das instalacións sanitarias

Logo de comezar a mañá ante o Álvaro Cunqueiro, en Vigo, onde denunciou, entre outras irregularidades e deficiencias, o sobrecuste de 470 millóns do hospital, o secretario xeral do PSdeG, José Ramón Gómez Besteiro, desprazouse ata Porto do Son, municipio no que a atención primaria, e en especial o servizo de pediatría, se atopa nunha situación crítica, ao igual que acontece no resto das dependencias sanitarias de toda a comarca de Noia.

“Todas aquelas denuncias que fixo o Partido Socialista concretáronse na triste realidade de que houbo un desfase de case 500 millóns”, recordou para contrapoñer ese despilfarro coa situación dunha atención primaria “que para Rueda e o Partido Popular parece ser secundaria ou terciaria” debido á continua falta de recursos, tanto materiais coma humanos, que padece.

Para Besteiro, que estivo acompañado polo deputado Julio Abalde e portavoces e outros cargos socialistas dos catro concellos da comarca, ese contraste “demostra quen aposta pola sanidade pública e quen se centra máis na atención da sanidade privada”. Para os socialistas, asegurou, a primeira “é un ben a preservar e protexer, non é un fondo que esquilmar”. Pero “iso é o que está facendo, desgraciadamente, o Partido Popular”, lamentou.

O líder socialista debuxou o panorama no que se atopa a comarca en canto a recursos sanitarios. En Lousame non hai pediatra, que compartía con Porto do Son, nin matrona, e non se están a cubrir as xubilacións de médicos de familia. Noia dispón neste momento do único pediatra dos catro municipios da comarca (tras a baixa dun segundo), e os tempos de espera son inasumibles. Tampouco o PAC dispón de pediatra.

Porto do Son quedou sen facultativo para a atención infantil o pasado 1 de xullo, non hai matrona e tampouco se están a cubrir as baixas por xubilación. Ademais, os usuarios do centro de saúde e o persoal padecen as pésimas condicións nas que se atopan as instalacións, á espera da construción dunhas novas que non chegan.

Tampouco en Outes hai pediatra dende principios de mes. Dun cadro de cinco médicos, un xubilouse e outros tres están a piques, polo que a curto prazo o centro de saúde só vai dispoñer dun facultativo e dous mires no final do seu período de formación.

Eses déficits “son comúns a toda Galicia”, asegurou Besteiro, pero durante o verán a situación aínda se complica máis coa chegada de visitantes. “En comarcas como na que nos atopamos pódese duplicar a poboación, co que, se os problemas afectan a 32.000 persoas, en vacacións fácilmente máis de 70.000 contan cun só pediatra, neste caso, o que hai en Noia”, puxo como exemplo dun caos que é “xeneralizado, que se radicaliza no verán” e que implica “tratar a uns galegos como de primeira e a outros como de segunda”.

A aposta dos socialistas, pola contra, “é un plan de choque para a atención primaria, para contratar máis médicos, deixar de pechar centros de saúde e abordar obras e investimentos importantes que se teñen que facer”, e non poñer “parches” coma a contratación para a atención primaria de mires que aínda están a completar a súa formación. Para Besteiro, isto último é un episodio máis da “mala planificación durante os últimos 15 anos”.

“Eu creo que é ben fácil saber cando un médico ou unha médica poden entrar en idade de xubilación. E por desgraza, os médicos tamén piden vacacións”, ironizou para insistir en que existe “unha falta de investimentos na sanidade pública, especialmente na atención primaria, pero tamén hai unha desastrosa planificación”.

Compartir
Publicado por
PSdeG-PSOE

Últimas novas

  • Actualidade

O Grupo Socialista defende integrar a formación no uso dos dispositivos dixitais no sistema educativo como medida preventiva fronte ao ciberacoso

Julio Abalde reclámalle a Educación que dea conta da aplicación do protocolo fronte ao acoso…

13/02/2025
  • Actualidade

O Grupo Socialista acusa á Xunta de encargar unha enquisa “ad hoc” sobre a lingua para “fabricar unha Galicia imaxinaria que non existe”

Silvia Longueira puntualiza que “cando a realidade non lles da a razón encargan a unha…

13/02/2025
  • Actualidade

Os socialistas denuncian unha nova alianza do PP coa ultradereita en contra do uso do galego

Obdulia Taboadela censurou no Congreso “o boicot á nosa lingua” por parte dos populares mentres…

13/02/2025
  • Actualidade

Silvia Longueira denuncia a estratexia da Xunta de “parálise e destrución progresiva” da Dependencia

A deputada socialista Silvia Longueira presentou hoxe unha pregunta urxente no Parlamento de Galicia para…

12/02/2025
  • Actualidade

O Grupo Socialista reclámalle á Xunta que reforce o profesorado de apoio no CEIP Bergantiños de Carballo

Patricia Iglesias alerta da “situación crítica” no centro provocada polos “recortes en educación” aplicados polo…

12/02/2025
  • Actualidade

O Grupo Socialista urxe á Xunta a garantir prazas asistenciais para adultos con TEA na provincia de Pontevedra

Paloma Castro sinala que en toda a provincia só hai 56 prazas e lembra que…

12/02/2025