A portavoz de Comercio e Turismo do Grupo Socialista, Leticia Gallego, lamentou hoxe o veto do PP a dúas propostas que presentou o Grupo Socialista en Comisión parlamentaria para pedirlle á Xunta un Plan de choque de apoio ao turismo e para pedirlle que execute os recursos transferidos polo goberno de España para apoiar ao pequeno e mediano comercio fronte á crise xerada polo coronavirus.

Lamentou en primeiro lugar que “o PP non ten intención de darlle a resposta necesaria ao sector turístico” logo de anunciar o seu veto á proposta socialista na que “pedimos algo tan sinxelo como dialogar co sector para aprobar un plan de choque” fundamental para que o turismo poida resistir a crise derivada da covid. Lembrou que a Xunta ten competencias plenas en materia de turismo, malia o que “carecen dunha liña de acción potente e o seu plan de reactivación é insuficiente”.

Gallego reivindicou “un sistema de protección do turismo en cuestións laborais, económicas, sociais e ambientais baseadas na sustentabilidade” e “promover todas as accións necesarias para a recuperación da actividade e garantir a supervivencia das empresas e o mantemento do emprego”. Lembrou que só a industria turística representa o 12,3 por cento do PIB galego, e en 2019 xerou 123.000 empregos, e rexistra 314 millóns só en ingresos hoteleiros.

Comercio

A parlamentaria socialista considera ademais “incomprensible” que o PP rexeitara ademais unha proposición non de Lei coa que os socialistas galegos lle pedían á Xunta que “empregue os recursos públicos transferidos polo Goberno central na dinamización do pequeno e mediano comercio galego para que podan facer fronte á crise xerada pola expansión da covid-19”. Advertiu que “non sabemos onde meten os máis 300 millóns de euros que o Estado lle enviou a Galicia”.

Advertiu que “a Xunta dedica escasos recursos ao pequeno e mediano comercio, tendo en conta as urxentes necesidades do sector”, mentres demostra unha “despreocupación total polos comerciantes nesta etapa” difícil. Advertiu que as medidas previstas polo goberno galego resultan “totalmente insuficientes” e incluso “ínfimas” para os 30.000 comerciantes rexistrados en Galicia.

Sinalou que “os trípticos están moi ben, pero cumpre ir moito máis alá”, cun plan autonómico “moito máis ambicioso” mentres “non chegan as axudas aos comerciantes” e, dixo, non hai máis que falar con eles.