A deputada do PSdeG, Patricia Otero, reclamou hoxe á Consellería de Economía e Industria que se comprometa a “paralizar” o ERE de Alcoa tendo en conta a posibilidade de que “os termos no que se presenta poden incorrer en fraude de lei”. A parlamentaria esixiu no Parlamento á Xunta “que a través da súa autoridade laboral manteña esta vía de presión” sobre a multinacional “nunha acción conxunta e coordinada” co Goberno do Estado, sinalou.

Neste sentido, Otero saudou “positivamente” o feito de que Feijóo “entendese ao fin” o que sempre defendeu o PSdeG, que a multinacional “quería marchar si ou si para deslocalizar a produción” e por iso, “excusas como o debate sobre o prezo da enerxía” eran segundo salientou a deputada, “unha manobra de distración”.

Por outra banda, a parlamentaria do PSdeG lembrou que este luns o Ministerio de Industria remitiu un requerimento a Alcoa para fiscalizar as axudas por CO₂ correspondentes a 2019, unha ferramenta máis para Otero “na necesaria estratexia de presión que deben manter as administracións a todos os niveis” para obrigar a que se a multinacional quere pechar devolva as axudas millonarias recibidas.

 Finalmente, a deputada trasladou todo o respaldo do Grupo Socialista aos traballadores de Alcoa, os seus representantes legais así como os traballadores das empresas auxiliares “que se levan mobilizando lexítimamente na defensa da produción e o seu emprego”.