Lara Méndez sinalou que a política económica do PP en Galicia “non é prudente, nin eficaz, nin solidaria”, tal como mostran os datos da análise que vén de realizar a Airef

A secretaria de Organización socialista criticou que o Goberno de Rueda volva incumprir a regra de gasto e ironizou con que “está a dirixir a política galega a base de bonos”

“O PP vendeu durante anos unha imaxe de boa xestión que non se corresponde coa realidade”. É o que, segundo denunciou hoxe a secretaria de Organización do PSdeG e viceportavoz segunda do Grupo Socialista no Parlamento galego, Lara Méndez, se desprende do último informe da Autoridade Independente de Responsabilidade Fiscal (Airef) sobre a execución orzamentaria, a débeda pública e a regra de gasto da Xunta de Galicia.

Méndez advertiu que a xestión de Feijoo e Rueda “é unha mentira reiterada que o tempo e os informes van desmontando”, porque os datos da Airef “son claros”, dixo. “Galicia incumpre as regras fiscais, gasta máis, sen orde nin control, non mellora os servizos públicos e mantén rebaixas fiscais feitas a medida dunha minoría privilexiada”, criticou para incidir en que a política económica do PP en Galicia “non é prudente, nin eficaz, nin solidaria”.

A deputada socialista recordou o carácter independente dun organismo “que avalía a saúde das contas públicas con criterios técnicos e obxectivos”, e o que di da Xunta “é grave”, destacou. Así, subliñou que Galicia incumpre unha vez máis a regra de gasto, “e sen un plan para corrixilo”, porque “o único plan que ten a Xunta de Galicia enriba da mesa é o bonoplán”, ironizou en referencia á profusión de bonos para fomentar o consumo que está a ofrecer o PP durante os últimos anos. “Está a dirixir a política galega a base de bonos”, remarcou.

Lara Méndez explicou que no 2024 a Xunta “disparou o seu gasto computable ata un 9 %, por enriba do límite permitido, que está nun 2,6 %”. Lembrou tamén que ese tope “é unha referencia obxectiva” en función do crecemento sostible da economía e de obrigado cumprimento para as Administracións. Ademais, “non foi a primeira vez que incumpriu”, xa que ocorreu o mesmo no 2016 e no 2019.

“É un modelo de xestión que falla de maneira reiterada e preocupante, sen medidas correctoras e sen rumbo, e sen ningún tipo de proxecto”, afirmou. E explicou que a propia Airef “é clara” cando di que o plan económico-financeiro da Xunta non inclúe “ningún plan realista para reconducir a situación nin garante o cumprimento da regra de gasto nos vindeiros anos”. De feito, xa anticipa outro incumprimento no 2026, co que “a desviación seguirá medrando”.

“Gástase máis, pero non no que importa”

A viceportavoz segunda do Grupo Socialista lamentou que “pese a que se gasta máis, non se gasta no que verdadeiramente importa”. Dixo que sería entendible un incremento da débeda “para atallar problemas estruturais da nosa comunidade”, pero non que se impulse un gasto “sen control” para non repercutilo na vida da xente. “Os centros de saúde seguen sen persoal; as listas de espera, disparadas; os servizos sociais, saturados; as valoracións de dependencia, sen resposta, e a educación precisa de reforzos urxentes, pero todo iso non chega”, censurou.

“A onde van eses cartos? En que se invisten?”, preguntouse, e apuntou directamente ás “rebaixas fiscais para os seus amigos”. “E o resto, que agarde”, apostilou. Nese punto, reprochoulle a Rueda que manteña bonificacións de impostos “dirixidas ás rendas máis altas”, ao patrimonio e “aos seus sectores afíns”, co resultado dunha redución da capacidade de ingresos da Xunta, algo que non beneficia á maioría da poboación. Todo o anterior deixa claro, segundo dixo Méndez, “que o PP goberna para os seus, para unha minoría”.

“O mito da boa xestión do PP cae polos seus propios datos”  

A secretaria de Organización lamentou que ese modelo de xestión responde a “unha clara elección política da dereita para premiar a uns poucos e recortar as posibilidades de mellora do conxunto da sociedade”. De feito, o informe da Airef recolle “literalmente” que as medidas tributarias que o PP introduciu no 2023 e no 2024 “repercutiron negativamente nos ingresos, e engade que o van seguir facendo no 2025 e no 2026”.

Iso contrasta cunha Xunta que está a solicitar máis financiamento. “Por un lado reduce a súa capacidade de recadar para beneficiar ás rendas altas, e tampouco quere a condonación dunha débeda de máis de 4.000 millóns de euros, e por outro lado pide máis ingresos ao Estado”, repasou a parlamentaria socialista, para quen “o mito da xestión do PP cae polos seus propios datos”.

A proposta da Comisión Europea, “moi lesiva” para Galicia

A preguntas dos medios, Lara Médez tamén se pronunciou sobre o marco financeiro plurianual da UE para o período 2028-2034. En concreto, fíxoo sobre a diminución dos fondos destinados á PAC e á pesca. “É unha mala proposta para Galicia e para o seu sector primario, porque estamos a falar dunha redución dun 20 % para o agro e no caso do sector pesqueiro queda nun terzo do que había”, dixo.

Indicou que, polo momento, trátase dunha proposta, pero botou en falta que Rueda viaxase a Bruxelas “non para preocuparse realmente por cal ía ser esa proposta, non para defender o sector primario galego, senón para ir en contra dos intereses dos galegos e das galegas”. Nese senso, esixiulle ao presidente da Xunta que reclame ante unha Comisión Europea “con maioría do PP” contra unha proposta “moi lesiva”. “Nós xa rexistramos unha batería de iniciativas”, recordou.