O portavoz de Sanidade do Grupo Socialista, Julio Torrado, criticou hoxe o veto do PP a incrementar o número de logopedas na sanidade pública para duplicar os 17 profesionais que ten contratados hoxe o goberno galego, 14 no Sergas e 3 máis en Política Social. O responsable socialista acusou ao PP e ao goberno galego de “deixar de lado esta especialidade” e as súas aportacións á sanidade pública.

Torrado advertiu que os criterios profesionais falan da necesidade de contar cun logopeda por cada 60.000 habitantes, mentres Galicia atópase 3 veces por debaixo desta ratio, con un logopeda para cada 193.000 habitantes. Ademais, explicou, o seu reparto demostra un “evidente desequilibro e inequidade absoluta”, xa que hai 16 traballando entre A Coruña e Pontevedra, un só en Lugo e ningún na provincia de Ourense.

Acusou ao goberno galego de “apostar por estancar esta especialidade” e acusou ao PP de facer un discurso de apoio a estes profesionais “para despois defender a xestión do goberno galego” e vetar unha ampliación do persoal “totalmente viable”, que suporía contratar 17 logopedas máis nos 3 próximos anos. Criticou que lles dediquen “moito cariño, pero de contratar nada”, facendo caso omiso das reclamacións do Colexio Oficial de Logopedas.

Sinalou que o reforzo destes profesionais na sanidade pública permitiría unha atención “máis completa, ampla e relevante do que hoxe é”, ademais de contribuír a unha maior eficiencia da atención hospitalaria incluso tamén dende a súa incorporación á Atención Primaria.

Defendeu que a súa presenza na sanidade pública contribúe a “desafogar” o traballo doutros profesionais con persoal “específico” para atender ao 2,5 por cento da poboación galega que padece trastornos da comunicación, aos que se suman os problemas relacionados coa inxesta ou derivados.