O portavoz de Educación do Grupo Socialista, Luis Álvarez, lamentou hoxe o veto do PP a unha proposta socialista para avaliar a implementación da Estratexia Galega de Linguas Estranxeiras. O responsable socialista puxo en dúbida a eficacia deste programa da Xunta supostamente destinado a implantar un “teórico modelo plurilingüe” no ensino infantil, secundario e FP.

Álvarez criticou que tanto o PP como o goberno galego estean adiando unha avaliación dos programas Plurinfantil, a Rede de Centros Plurilingües, o Pluribach e PluriFP ata o remate do período que contempla a Estratexia en 2020. Advertiu que a avaliación resulta imprescindible para garantir o éxito de calquera política pública, así como para asegurar a súa eficiencia, equidade e transparencia.

Reclamoulles que fagan públicas as avaliacións que teñan feito, e advertiu que “a participación dos alumnos nos programas de mellora da competencia lingüística ten que dar resultado, ou do contrario obrigan a asumir que estes programas non valen para nada”.

O responsable socialista advertiu que o goberno galego concédelle a categoría de Centro Plurilingüe a calquera deles con tal de impartir “unha única área ou materia en inglés” en algún curso. Sinalou que “a inmensa maioría dos centros plurilingües certificados pola Xunta imparten en inglés educación artística, que son 2 horas á semana –unha de educación musical e outra de plástica- nun só curso.

Deste xeito, de acordo cos datos do Ministerio de Educación do curso 2019-2020, ao analizar a porcentaxe do alumnado que participa en experiencias de utilización de linguas estranxeiras, Galicia atópase 11 puntos por debaixo da media en canto á “aprendizaxe integrada de contidos e lingua estranxeira”. Esta categoría refírese aos programas que se imparten polo menos en tódolos cursos de cada unha das etapas de ensino obrigatorio.

Sen embargo, Galicia si que destaca na categoría de “Outras experiencias”, onde se atopan os programas que inclúen o uso de lingua estranxeira para unha ou máis áreas ou materias en algún dos cursos. Neste caso, Galicia rexistra un 17 por cento fronte ao 4,2 de media estatal en Primaria e nun 11,9 por cento, por enriba do 3,4 de media, en Secundaria.