Paloma Castro denunciou que o propio PP recoñeceu no Parlamento galego que non se deu nin un só paso para impulsar o ambulatorio, pese a que en 2021 o Goberno galego anunciou a súa inclusión na primeira fase do Plan de Infraestruturas Sanitarias de Atención Primaria e a que xa ten os terreos a disposición

A deputada socialista Paloma Castro reclamoulle hoxe á Xunta en comisión parlamentaria que inclúa nos seus Orzamentos a construción dun novo centro de saúde en Poio. “Queremos que figure con nomes e apelidos nos Presupostos”, esixiu.

Castro sinalou que “xa se trata dunha demanda histórica da veciñanza”, que vén demandando unhas instalacións “que cumpran as condicións necesarias para garantir unha atención sanitaria de calidade aos máis de 17.000 habitantes do municipio”, unha cifra que, apuntou, incluso se pode duplicar durante o verán.

Paloma Castro recordou que no actual ambulatorio de Anafáns “falta espazo tanto para a espera como para que os profesionais desenvolvan o seu traballo no interior”, unha circunstancia que o imposibilita para a prestación de “especialidades esenciais, coma fisioterapia, odontoloxía, nutrición… que teñen que ser derivadas a centros de Pontevedra”.

A parlamentaria do PSdeG denunciou que o PP “utilizou a promesa dese novo centro como unha arma electoral, chegando mesmo a asegurar en outubro de 201 que no Plan de Infraestruturas Sanitarias de Atención Primaria se prevía a construción dunhas instalacións de 2.289 metros cadrados”. “Pois ben, transcorridos catro anos desde aquela promesa, non hai ningún sinal da obra, e iso pese a que existen terreos dispoñibles e un amplo consenso social”, remarcou.

“Un plus de inutilidade”

Castro lamentou que o proxecto siga paralizado cun alcalde do PP que goberna desde hai dous anos e medio. “Iso supón un plus de inutilidade, xa que vimos hai unhas semanas como a alcaldesa de Ribeira collía o bastón de mando e de xeito instantáneo se desbloqueaba o proxecto de residencia de maiores”, ironizou.

A deputada do PSdeG engadiu á falta de instalacións adecuadas “a escaseza de persoal” no actual ambulatorio, no que non se cobren as prazas. “Iso provoca un aumento das listas de espera en atención primaria e sobrecarga de traballo para os profesionais, que teñen nas súas carteiras unha media de 1.400 pacientes”.

Para Castro, as escusas que ofrece PP non fan máis que confirmar e “recoñecer que a Xunta non deu ningún paso para a construción do centro de saúde en catro anos”. Mentres, a veciñanza “non dispón dunha atención sanitaria digna”. Como exemplos dese déficit, engadiu aos antes citados que “tampouco hai espazo para as urxencias” e que onde debería haber 5 médicos “hai en realidade 3”.

“É hora de que deixen as promesas electorais e garantan condicións dignas para a veciñanza e os profesionais construíndo o novo centro que precisa Poio e cubrindo todas as prazas necesarias. Do contrario, a Xunta seguirá demostrando que a sanidade pública é a última das súas prioridades”, concluíu a deputada socialista.