A parlamentaria socialista Patricia Vilán esixiulle ao goberno galego que paralice o depósito de lodos do Lérez e do fondo da Ría de Pontevedra na Illa de Sálvora. Vilán presentou unha pregunta oral en Comisión na que lembrou que a zona protexida ten acumulado nos últimos 10 anos “non menos de 2 millóns de metros cúbicos de residuos”, de acordo cos estudos oficiais.

A parlamentaria socialista apuntou que o goberno galego estivo situando os lodos dragados do fondo da Ría a apenas 2 millas da franxa de protección da Illa de Sálvora, que é unha zona OSPAR, zona de especial protección dos valores naturais –ZEPVN-, Zona de Especial Conservación –ZEC-, Zona de Especial Protección para as Aves –ZEPA-, e Ben de Interese Cultural coa categoría de paisaxe protexida.

Sinala que “a preocupación veciñal e dos patróns maiores da Ría de Arousa, encabezados polas confrarías de Ribeira e Aguiño, é grande”, diante das consecuencias da “montaña de sedimentos” que xa existe. Esta provoca enturbamento das augas, “ademais do perigo que suporía a presenza de elementos contaminantes dada a orixe urbana e industrial dos lodos que se guindarían na contorna da Illa”.

A responsable socialista advertiu na súa intervención que “curiosamente, nunca fala o Goberno galego da posibilidade de levar os lodos á antiga Sogarisa, mentres o río Lérez e a ría de Pontevedra cegan”.