Urxe ao goberno galego que traballe na mellora da Lei de Inclusión Social de Galicia para buscar a “complementariedade” entre a RISGA e o IMV

Suxire unha lei do terceiro sector para apoiar e blindar os dereitos dun sector “piar” para a reconstrución de Galicia

A voceira de Política Social, Marina Ortega, vén de propoñer á Xunta a que destine o orzamento aforrado polo goberno galego na RISGA grazas á implantación do Ingreso Mínimo Vital (IMV) por parte do goberno de España en “itinerarios de inserción laboral en coordinación cos servizos sociais”. Fíxoo, hoxe, na Comisión de Política Social do Parlamento trala comparecencia do director xeral de Política Social.

Ortega puxo en valor o IMV, renda da que se están a beneficiar máis de 11.000 persoas en Galicia grazas ao “esforzo” que levou a cabo o goberno de España. Neste senso, pediu ás administracións públicas unha maior “coordinación” que permita “optimizar” todas as axudas para que as persoas en risco de exclusión social poidan recibir “os máximos beneficios posibles”.

Nesta liña, urxiu á Xunta a traballar na mellora da Lei de Inclusión Social de Galicia que permita buscar unha “complementariedade” entre a RISGA e o IMV, o cal sería “moi importante” para as persoas en situación de vulnerabilidade, xa que agora mesmo estas dúas prestacións son incompatibles. Ademais, propuxo ao goberno galego unha lei do terceiro sector para apoiar e blindar os dereitos dun sector “piar” para a reconstrución de Galicia.

Doutra banda, Ortega puxo en valor o traballo desenvolvido no eido da política social polos concellos galegos, cuestión “que o goberno galego non tivo en conta” á hora de elaborar os orzamentos da Xunta de 2021 cando “reduciron” as partidas destinadas aos mesmos nas contas.

Por último, a responsable socialista “tendeu a man” ao goberno galego á hora de levar a cabo “todas as propostas” que permitan “mellorar a vida dos galegos e galegas en situación de vulnerabilidade”.