O portavoz do Grupo Socialista, Luis Álvarez, criticou hoxe o “cinismo” demostrado polo presidente da Xunta ao xudicializar a xestión de fondos comunitarios por parte do Estado. Así o dixo logo da reunión da Xunta de Portavoces que fixou a orde do día do Pleno da próxima semana, no que Álvarez interpelará ao presidente da Xunta logo de evidenciar que a Xunta “fai algo totalmente diferente ao que pide”.

O responsable socialista emprazou ao presidente da Xunta a que na próxima sesión de control dea conta da súa decisión de “entrar a rebufo dunha polémica artificial” creada por Ayuso, cando a Xunta ten repartido no ano pasado 2,5 millóns de euros de axudas ás entidades locais sen criterios obxectivos nin transparencia. Álvarez lamentou que o presidente da Xunta “esíxelle ao Goberno do Estado o que nin el mesmo cumpre”.

Sinalou que a ameaza de acudir aos tribunais ten como único obxectivo “sementar dúbidas sobre a xestión do goberno do Estado”, logo de que fora avalado pola UE ao ser o primeiro en recibir as partidas Next Generation EU precisamente pola súa xestión “correcta, eficaz e con criterios obxectivos”.

Luis Álvarez apelou ao respaldo da UE para sinalar que a estratexia da Xunta supón “sumarse a unha batalla perdida”, precisamente nunha materia na que o goberno galego “ten moito que ocultar” logo de anos de “xestión deficitaria”.

O responsable socialista deu conta hoxe das iniciativas que os socialistas galegos levarán ao próximo Pleno do Parlamento, que incluirán unha proposición non de Lei para reclamarlle á Xunta un plan de choque contra a sinistralidade laboral, consecuencia directa da precariedade e as malas condicións laborais. Sinalou que Galicia ten rexistrado un índice “absolutamente inasumible”, co 4,2 por cento da sinistralidade do Estado, con 24.511 accidentes no ano 2020.

Sanidade

O Grupo Socialista presentará ademais unha proposición no de Lei para reclamarlle á Xunta que recupere a presencialidade na Atención Primaria, logo das esperas provocadas nos últimos meses como “consecuencia dos múltiples recortes aplicados por Feijóo ao persoal sanitario, na formación de médicos e en recursos humanos do sistema sanitario.

O portavoz do Grupo Socialista lamentou que a Xunta se teña amosado “experta” en buscar “culpables externos” e “anunciar que todo o que sae ben é mérito do goberno, e o que sae mal depende dun factor externo”. O Pleno rematará cunha pregunta oral do Grupo Socialista logo da restrición de actividade nas unidades de Atención Primaria de 14 centros de saúde de Vigo por decisión da Consellería de Sanidade a comezos deste ano.

Álvarez sinalou ademais que o Grupo Socialista levará unha interpelación para reclamarlle á Xunta que dea conta da publicación dos contratos asinados pola administración autonómica, que ten en branco dende o ano 2018, o último no que cumpriu con esta obriga institucional. Lamentou que con estas prácticas demostran que “a transparencia só lles preocupa cando é responsabilidade de outros”.

O Pleno da próxima semana tamén incluirá unha moción do Grupo Socialista sobre atención temperá e varias preguntas sobre a política do goberno galego relativa ao desenvolvemento da industria e da enerxía eólica en Galicia e a recuperación para o público do convento de Santa Clara, en Pontevedra.