O portavoz de Sanidade do Grupo Socialista, Julio Torrado, denunciou hoxe a “enxeñería fiscal” do PP para “explotar aos traballadores en áreas deficitarias do servizo público máis importante, que é a Sanidade”. Así o dixo na rolda de encontros dos grupos da oposición cos profesionais que o PP vetou na Comisión de Investigación da Sanidade, e que hoxe reuniu no Parlamento a dúas pediatras de Barbanza e de Ames.

O responsable socialista lamentou que o goberno galego teña feito “todos os esforzos” en artellar contratos en precario en lugar de preocuparse de planificar a longo prazo solicitando máis prazas MIR de Pediatría que permitiran incrementar o número de profesionais. Acusou ao PP e ao goberno galego de utilizar a escaseza de profesionais “máis como unha escusa que como un problema”, tratando á especialidade “como un luxo e non como un dereito”.

Ademais, advertiu que o Ministerio de Sanidade “ten demostrado máis interese que a Consellería en dotar de pediatras ao Sergas”. Así o dixo aludindo ao repentino interese do goberno galego por activar a vía excepcional para incrementar as prazas asignadas a Galicia “logo de 7 anos de goberno de Rajoy nos que o goberno galego permaneceu mudito”.

Explicou que aquela solicitude, feita sen cumprir cos requisitos, “de ter sido aceptada polo Ministerio tería paralizado as prazas para este ano, ao obrigar a revisar toda a documentación para as peticións da Xunta” o que aos ollos de Torrado evidencia que “non queren solucións”.