Na reunión que mantivo esta mañá con a presidenta e a vicepresidenta da confederación das anpas galegas, o portavoz socialista denunciou un novo inicio de curso caótico

Besteiro iniciou a rolda de prensa falando da situación en Palestina: “En Gaza vivimos unha masacre diaria, un verdadeiro xenocidio que non pode caer no esquecemento”

A preguntas dos xornalistas lembrou que “o PP hipotecou a AP-9 ata 2048; os socialistas fomos os únicos en baixar os peaxes, e agora é o momento do 100% da bonificación, da gratuidade”

O secretario xeral do PSdeG, José Ramón Gómez Besteiro, asegurou este martes que a educación pública en Galicia vive “unha situación extrema” tras 17 anos de recortes do PP.

“O curso arrinca con caos, improvisación, falta de profesorado e problemas nas infraestruturas”. Nesta liña advertiu, trala reunión que mantivo coa presidenta e vicepresidenta da Confederación das Anpas galegas,  que o 12% do alumnado galego necesita reforzo educativo “pero  a Xunta négase a contratar máis docentes nin a cumprir cos desdobramentos pactados cos sindicatos”.

Besteiro puxo o foco no rural, onde a situación é “aínda máis grave”: “O alumnado está dobremente castigado: con menos profesorado, con discriminación no transporte escolar e con centros que arrancan o curso con obras pendentes. Esa é a realidade tras case dúas décadas de gobernos do PP”.

Ademais, acusou á Xunta de querer impoñer unha falsa “neutralidade ideolóxica” no ensino: “Non é máis que unha ferramenta para reducir a autonomía do profesorado e limitar a capacidade crítica do alumnado”.

O secretario xeral do PSdeG tamén criticou o “fracaso do modelo estrela do PP”, a dixitalización: “Non chega con repartir tablets. Sen formación nin actualización, o proxecto está caduco e non garante competencias dixitais de verdade, tal e como advertiu tamén o Consello de Contas nun informe demoledor”.

En resumo, explicou, “a escola pública galega é hoxe menos pública, menos gratuíta e menos eficaz. E as familias son as que pagan a factura”.

Gaza: “O que está a acontecer é unha masacre, un xenocidio”

Besteiro abriu a súa intervención ante os medios cunha condena durísima contra  á ofensiva israelí sobre Gaza: “O que está a acontecer é unha masacre, un verdadeiro xenocidio contra o pobo palestino”, proclamou.

Afirmou  que “o Estado de Israel practica un exterminio sistemático, con bombardeos indiscriminados e con asasinatos de nenos e nenas todos os días. É unha brutalidade que temos que condenar constantemente, sen descanso e sen caer na mínima compracencia”, advertiu.

“O máis dramático é que quen perpetra este xenocidio é un Estado que naceu da memoria do Holocausto”, engadiu. Por iso apelou a unha “mobilización permanente da sociedade” e á presión internacional: “O que pedimos é un alto ao fogo inmediato e que se respecte o dereito á vida do pobo palestino”.

AP-9: “É o momento do 100% da bonificación”

Posteriormente, e a  preguntas dos xornalistas, Besteiro referiuse á AP-9 e defendeu que só os socialistas impulsaron a baixada dos peaxes: “Pasamos do 50 ao 75% grazas ao Goberno de España, sen apoios nin do PP, nin do BNG, e agora é o momento do 100% da bonificación que reclaman os galegos e as galegas”.

Lembrou que foi o PP o responsable da “hipoteca histórica” da concesión: “Foi Aznar quen a prorrogou ata 2048, co aplauso de Rajoy, Feijóo e Rueda. Esa é a herdanza envelenada que hoxe seguimos pagando”.

Admitiu que dado que a devandita concesión pode seguir a senda da xudicialización,  “os e as socialistas galegas cremos que este é o momento político de dar o salto definitivo, e o PSOE está disposto a facelo. É o momento de dar o salto á gratuidade total”.