O líder dos socialistas galegos sinala que a falla de liderado político real da Xunta provoca o “fracaso na resposta ao avellentamento e á dependencia”

O secretario xeral do PSdeG, José Ramón Gómez Besteiro, acusou hoxe ao presidente da Xunta de tratar aos servizos sociais “como un problema que se externaliza” en lugar de facer deles unha “política pública central”. Así o dixo durante unha xuntanza con colectivos sociosanitarios de Pontevedra na que analizou a falla de liderado político real por parte do goberno galego.

O responsable socialista puxo como exemplo da “externalización” dos servizos sociais o caso das residencias construídas pola Fundación Amancio Ortega, que pasa a doalas á Xunta para que a xestión final “pase a ser privada ou confesional”.

Afeoulle ao goberno galego que ceda funcións estruturais das políticas públicas a entidades privadas ou fundacións, “e quen está a pagar os salarios destes servizos non é a Xunta, senón que son as entidades sociais a crédito”. Aludiu así a que actualmente hai 88 organizacións facéndose cargo da xestión de 5.188 prazas de atención á discapacidade concertadas, obrigadas a abrir liñas de crédito para sobrevivir porque a Xunta non regulariza o incremento no concerto social.

Besteiro Advertiu que “hoxe en Galicia os servizos sociais non son a resposta ao avellentamento e á dependencia, senón que son o problema” pola falla de xestión por parte do goberno galego. Criticou a “falla de liderado político real” por parte do goberno galego, que está a provocar unha crise aberta na xestión da Dependencia que deriva en retrasos inasumibles para os usuarios, saturación do servizo e descoordinación.

Lembrou que a Consellería de Política Social leva 16 anos incumprindo a obriga legal de aprobar un Plan Estratéxico de Servizos Sociais, polo que o sistema está a operar sen marco estratéxico, con problemas graves nos servizos responsabilidade do goberno galego.

O secretario xeral do PSdeG mantivo este encontro antes de participar nunha xuntanza coa militancia das comarcas de Arousa e Pontevedra xunto co secretario xeral do PSdeG na provincia, David Regades.