O portavoz do Grupo Socialista na Comisión de Relacións co Consello de Contas, Julio Torrado, alertou hoxe do reiterado incumprimento das recomendacións do ente fiscalizador por parte da Xunta. Así o dixo na comparecencia do conselleiro maior par presentar a memoria de actividades de 2018 e a fiscalización da conta xeral de 2017.

Torrado aplaudiu a independencia que reivindica o Consello de Contas fronte a un goberno galego que “o quere como palmeiro” ao tempo que “converten o Consello da Xunta no Comité de Dirección do PP, a CRTVG traballa como o gabinete de comunicación de Feijóo e o Parlamento é manoseado para facer del un circo de xogos florais”. Sinalou o “labor fundamental” do ente fiscalizador e reclamou maior autoridade para atender ás súas recomendacións.

Defendeu o traballo do Consello de Contas dentro do acerbo de organismos de fiscalización que “abren debates que temos comprobado que non interesan á administración autonómica”. Citou así o informe do Tribunal de Cuentas evidenciando a paralización da metade dos fondos correspondentes ao AVE por parte de Rajoy e Ana Pastor, que situou “entre a ignominia e a irresponsabilidade”, mentres “non atopamos queixas de Feijóo ao respecto”.

O parlamentario socialista apuntou ao problema de transparencia do goberno galego e de eficiencia en determinados servizos de forma reiterada. Sinalou a “falla de responsabilidade” do goberno galego á hora de ter en conta as avaliacións do organismo alertando por exemplo de que 28 das entidades instrumentais que dependen do goberno galego seguen sen remitirlle información a Contas, impedindo así ser auditadas “e non pasa nada”.

Debate sobre corrupción

Torrado solicitou desagregar os informes correspondentes á corrupción dentro da administración autonómica para habilitar un debate específico no seo do Parlamento de Galicia en base ás eivas detectadas polo ente fiscalizador. Tamén reclamou un análise dos ingresos do goberno galego que están a provocar desequilibros contables, por exemplo ao deixar de recadar 150 millóns de euros pola supresión “por decisión ideolóxica” do imposto de sucesións e doazóns ás rendas máis altas.

Sinalou ademais ás conclusións “preocupantes” da xestión da sanidade pública por parte do goberno galego, sinaladamente na alerta de Contas para dar conta da situación das fundacións públicas sanitarias, que escapan ao seu control mentres “utilizan o persoal destas fundacións para exercer labores dentro do Sergas para que non teñan que contratalo”. Advertiu tamén da falla de datos sobre a xestión de Povisa, “impedindo comparar se o que lle pagamos é moito ou pouco”.

Apuntou ás partidas mal orzamentadas de forma sistemática, como os 300 millóns de euros destinados a gasto farmacéutico “para poder dicir que se gasta menos” cando ao longo do exercicio ten que ser duplicado “ano tras ano”. Algo semellante sucede, apunta, co fondo de continxencia da Consellería de Sanidade, que en realidade vai destinado cada ano ao gasto estrutural de persoal cando “nin sequera é un programa”.