Paloma Castro denuncia o incumprimento por parte da Xunta do Plan do Plan de Xestión de Residuos Urbanos de Galicia

Lamenta que os obxectivos “para un escenario máis sostible” estean “moi lonxe de ser cumpridos” cando a Xunta orzamentou “só o 20% do que estaba previsto” en 2020 e desta cantidade “só executou o 23% do orzamentado”

A vicevoceira do Grupo Socialista, Paloma Castro, vén de denunciar o incumprimento por parte da Xunta do Plan de Xestión de Residuos Urbanos de Galicia (PXRURG). Fíxoo, hoxe, a través da presentación dunha pregunta ao goberno galego no Pleno do Parlamento.

Castro lamentou que a cantidade destinada a reciclado e preparación para a reutilización, no ano 2019, foi de 46.000 toneladas, unha cifra que se atopa “moi lonxe dos obxectivos marcados”, xa que as previsións das cantidades que se deberían destinar en Galicia para a este “tiñan que ser de 245.000 toneladas”.

Ademais, censurou que a Xunta no ano 2021 “non iniciou nin unha soa das once plantas industriais que tiñan previsto ter rematadas en 2017” e en 2021 “só orzamentou o 20% do que estaba previsto” e, desta cantidade, “só executou o 23% do orzamentado”.

Nesta liña, a responsable socialista lembrou que o PXRURG, aprobado en xaneiro de 2011 e actualizado en decembro de 2020 en base ás obrigas comunitarias, “estableceu uns obxectivos para impulsar a xestión de recursos domésticos cara a un escenario máis sostible”, pero estes obxectivos se atopan “moi lonxe de se cumpridos”.

De feito, insistiu, “entre estes obxectivos atopábanse, con carácter cualitativo, a prevención, o reciclado e reforzar o principio de xerarquía nas opcións de xestión de residuos” e “con carácter cuantitativo, antes de 2020, a cantidade de residuos domésticos e comerciais destinados á preparación para a reutilización e reciclado para as fraccións de papel, metais, vidro, plásticos, biorresiduos e outras fraccións reciclables deberían alcanzar en conxunto o 50% en peso”.

Por todo isto, Castro instou ao goberno galego a “non perder a oportunidade de aproveitar o potencial do sector ambiental” para “contribuír a superar a crise que vén por diante”, xa que “o tempo esgótase” e “non podemos permitir máis maquillaxes nin lavados de cara” neste senso.