O Grupo Socialista esíxelle ao goberno galego que “remate co desgoberno estrutural” na xestión de pesoal da Administración Pública

Patricia Iglesias mantén un encontro cos sindicatos con representación na Mesa Xeral de Función Pública

A portavoz de Calidade Democrática do Grupo Socialista, Patricia Iglesias, esixiulle hoxe ao goberno galego que “remate co desgoberno estrutural” na xestión de recursos humanos na Xunta de Galicia. Así o dixo logo dunha xuntanza de traballo cos sindicatos con representación na Mesa Xeral de Función Pública de Galicia hoxe nas instalacións do PSdeG no Parlamento de Galicia.

A responsable socialista recolleu as aportacións dos representantes dos traballadores da administración autonómica fronte á falla de planificación e de estratexia na función pública por parte do goberno galego. Iglesias comprometeuse a traducir as demandas dos sindicatos da función pública en iniciativas parlamentarias diante da nefasta xestión dos recursos humanos por parte do goberno galego.

Iglesias salientou o “abuso” das comisións de servizos por parte do PP no goberno galego, así como das interinidades e posibles cesións ilegais de man de obra. Alertou da falla de transparencia cos traballadores e traballadoras afectados polo concurso de traslados. Subliñou que o desgoberno dos recursos humanos deriva nunha situación de arbitrariedade inxustificable entre os traballadores da función pública.

A parlamentaria socialista advertiu que o PP está “premiando” dende o goberno galego “á provisionalidade sobre a excelencia técnica”, e esixiu medidas efectivas urxentes para “poñer fin á súa falta de orde e desgoberno”.