O Grupo Socialista esíxelle á Xunta que acorde coas forzas e corpos de seguridade o dispositivo para a atención hospitalaria segura dos presos da Lama no novo Montecelo

Paloma Castro sinala que o módulo de hospitalización penitenciaria no que son atendidos está situada no provincial pero teñen que ser trasladados ao Montecelo cando precisan de atención hospitalaria

A portavoz de Xustiza e Interior do Grupo Socialista, Paloma Castro, reclamoulle hoxe á Xunta que garanta a atención hospitalaria “especializada, segura e ben equipada” para os reos de Pontevedra. Castro presentou unha pregunta oral na Comisión de Sanidade para esixirlle ao goberno galego que acorde coas forzas de seguridade o dispositivo para a atención sanitaria dos presos no novo Gran Montecelo.

Castro explicou que a Unidade de Alto Risco -UAR- na que son atendidos atópase no Provincial, pero cando precisan de atención especializada teñen que ser trasladados ao Montecelo, obrigando a destinar dous axentes e un vehículo, e ocupando espazos que non poden ser utilizados polo resto dos doentes. Malia que o goberno galego anunciou a creación dunha UAR no antigo Montecelo, isto non sucederá ata dentro dun mínimo de 5 anos, cando remate a obra da segunda fase.

Sinalou que “non podemos permitir o agravio” que supón para a Policía Nacional que a Unidade de Alto Risco estea no provincial e teñan que trasladar aos reos ao Montecelo, e “moito menos que se prolongue varios anos máis”. Reclamoulle ao goberno galego que “poñan o foco” e garantan unha solución “máis rápida, aínda que sexa temporal”, xa que “a saúde e a seguridade non son incompatibles”, e deben garantir este dereito “sen comprometer a seguridade do hospital.

Advertiu que os sindicatos policiais están “preocupados” porque descoñecen a ubicación e as características da futura UAR, xa que o Sergas “non mantivo ningunha xuntanza con eles”. Explicou que as especificidades desta unidade requiren ter en conta moitos aspectos de seguridade ou privacidade para a súa ubicación que “deben ser consensuados con representantes das Forzas e Corpos de Seguridade.