O Grupo Socialista empraza á Xunta a colaborar e corresponsabilizarse coa aplicación do acordo con Mercosur con medidas de apoio á gandería

Lara Méndez reclama “responsabilidade, rigor e firmeza” das administracións, que deben garantir a eficiencia nos controis, o uso real das ferramentas que habilita o acordo e demostrar capacidade de reforzo do mercado interno de carne en Galicia.

A portavoz de Agricultura e Gandería do Grupo Socialista, Lara Méndez, apuntou hoxe que a Xunta debe de implicarse no cumprimento responsable e estrito do acordo con Mercosur, que “non ten por que ser malo para Galicia”. Méndez criticou a resposta “curtopracista e populista” fronte a este acordo e reclamou unha resposta pragmática para “potenciar os pros e minimizar as contras”.

A responsable socialista comparou as críticas fronte a este acordo cos “medos e incertidumes” provocados pola aplicación das cotas lácteas en 1984, cando o BNG pasou de consideralas como un obstáculo para o sector a participar en 2015 nas protestas para evitar o fin daquela medida.

Méndez puxo en valor a negociación do acordo na que o PSOE conseguiu que Bruxelas rebaixara ata o 5 por cento as cláusulas de salvagarda, o que “pode ser relevante para Galicia”. Isto supón que se os prezos caen por baixo do 5 por cento ou as importacións de carne aumentan en máis desta porcentaxe a Comisión Europea pode intervir suspendendo as preferencias arancelarias.

Reclama “responsabilidade, rigor e firmeza” das administracións, que deben garantir a eficiencia nos controis, o uso real das ferramentas que habilita o acordo e demostrar capacidade de reforzo do mercado interno de carne en Galicia, onde “a Xunta de Galicia ten moito que dicir e aportar”. Diante do “malestar e preocupación” do sector, reclamou unha aplicación clara e responsable do acordo, garantindo os estándares sanitarios, medioambientais e de benestar animal no produto.

Sinalou que “o problema para o sector gandeiro non é cuantitativo, senón cualitativo”, xa que as importacións autorizadas cos aranceis reducidos apenas supoñen o 1,5 por cento da produción de vacún, o 1,3 por cento das aves e o 0,1 por cento de porcino. Emprazou a levantar a garda para que non se produza unha rebaixa dos prezos marxinais no produto agrario, derivada da dependencia da UE da proteína vexetal que consume a cabana gandeira.

Lara Méndez emprazou a “avanzar nunha estratexia europea de autosuficiencia alimentaria”, cunha aposta decidida polo incremento da superficie agraria útil para aumentar a autonomía, así como mercados estables de subministración que eviten as subas e baixas repentinas de prezos nos custes de produción nun contexto incerto pola guerra arancelaria aberta polos Estados Unidos.