O Grupo Socialista denuncia que o PP reforza a súa estratexia de usar a televisión e a radio públicas para a súa “publicidade e propaganda”

Silvia Longueira criticou o nomeamento dunha persoa vencellada aos gabinetes de comunicación do último Goberno de Fraga para dirixir os medios públicos galegos

O nomeamento dunha persoa vencellada “á ideoloxía e ás directrices do PP” afonda na estratexia dos populares de converter os medios públicos en “publicidade e propaganda, como veñen facendo nos últimos dezaséis anos”.

A deputada Silvia Longueira denunciou hoxe que, nunha decisión “unilateral”, o Partido Popular propuxese para dirixir a televisión e a radio públicas galegas a unha periodista que estivo á fronte do gabinete de comunicación dunha consellería durante último Goberno de Fraga. Advertiu tamén que a mesma profesional tivo ao seu cargo o departamento de información e documentación dunha TVG “que acadou no último ano os seus peores resultados de audiencia”.

“Que supón este nomeamento?”, preguntouse a deputada do PSdeG, que explicou que o PP non atendeu as propostas do Grupo Socialista en canto ao perfil do futuro ou futura responsable dos medios de comunicación autonómicos. “Ninguén pode esperar que a Radio Galega e a TVG desenvolvan agora órganos que garantan a veracidade das informacións e a imparcialidade como bandeiras”, alertou como resposta.

Longueira enviou “todo o apoio do PSdeG” aos traballadores e traballadoras tanto da Televisión de Galicia como da radio pública, “que levan mantendo a maior folga de España, con máis de 360 venres negros”. “Tedes o noso apoio e forza para que este país poida chegar á liberdade de información e de expresión nos medios públicos”, insistiu dirixíndose aos profesionais da CRTVG.