O Grupo Socialista denuncia que o incumprimento reiterado por parte da Xunta dos acordos parlamentarios en materia de incendios está detrás do “desastre” deste verán

Carmen R. Dacosta acusa ao PP de “esquecer” as 123 medidas aprobadas no Parlamento en 2018 e incumprir a proposta socialista aprobada en 2022

A portavoz de Política Forestal do Grupo Socialista, Carmen Rodríguez Dacosta, denunciou hoxe o “incumprimento reiterado” por parte da Xunta dos acordos parlamentarios en materia de incendios forestais. Dacosta presentou unha pregunta oral na Comisión de Agricultura na que alertou de que o desleixo do goberno galego en materia preventiva está detrás do “desastre” deste verán.

Dacosta acusou ao goberno galego de negar a información sobre o cumprimento das 123 medidas aprobadas no Parlamento logo da Comisión de Estudo da Política Forestal e que contou daquela co apoio dos socialistas galegos. Un apoio, sinalou, que non se ve respondido co compromiso do goberno galego, que deixou aparcados os compromisos durante 7 anos e que derivou na maior vaga de lumes dende que hai rexistros.

Tampouco cumpriron co compromiso aprobado en 2022 a iniciativa do PSdeG con “medidas concretas e perfectamente asumibles para construír un sistema sólido baseado na planificación a medio e longo prazo, a prevención continua e a integración das conclusións da Comisión de Estudo de 2018.

Criticou que o PP se manteña enrocado en facer caso das propostas e rexeitar calquera proposta para dar conta do seu grao de cumprimento, condenando a Galicia a “seguir ardendo cada ano” porque, advertiu, “a política de incendios non pode depender das emerxencias, senón da prevención, da ordenación e da profesionalización”.

Acusou ao goberno galego de consolidar un modelo de prevención e extinción de incendios “fragmentado, estacional e dependente das emerxencias, que se repite ano tras ano con idénticos resultados”. Denunciou que “seguimos sen Plan Forestal Operativo, sen Plans de Ordenación dos Recursos Forestais e cun Pladiga que se presenta tarde e sen escoitar aos concellos e aos profesionais do sector.

A responsable socialista esixiu un servizo “público, único e profesional de prevención e extinción”, que manteña un modelo de prevención “continua e integral” durante todo o ano, a partir dunha “ordenación e planificación forestal efectiva” e que garanta a “transparencia, participación e avaliación” continuada.