Besteiro anuncia en Caldas a cancelación da variante oeste e reclama á Xunta que reactive a VG-47

O secretario xeral do PSdeG comunicou á veciñanza a cancelación do proxecto tal e como estaba deseñado e adiantou que se abre unha nova etapa para reformular a mobilidade na comarca

Anunciou que os socialistas levarán ao Parlamento de Galicia a demanda das e dos veciños de recuperar o proxecto da VG- 47, unha infraestrutura destinada a conectar o porto de Vilagarcía coa AP-9 e que permanece paralizada pola Xunta desde hai máis dunha década

Destacou que hai dúas formas de actuar: a escoita para buscar solucións dialogadas, como a do PSdeG, fronte a parálise de Rueda

O secretario xeral do PSdeG, José Ramón Gómez Besteiro, mantivo este mércores en Caldas de Reis unha xuntanza coa veciñanza das parroquias afectadas pola Variante Oeste e co alcalde Jacobo Pérez para abordar a situación dun proxecto que xerou unha forte contestación social nos últimos meses.

Besteiro trasladoulles o resultado das xestións que realizou co Goberno tal e como se comprometera coa veciñanza nunha xuntanza anterior:  a cancelación  do proxecto da Variante Oeste de Caldas tal e como estaba configurado. “O Goberno vai cancelar o actual proxecto e abrir unha nova etapa para reformular a solución de mobilidade nesta zona”, explicou.

Segundo indicou, esta decisión responde á necesidade de buscar alternativas que permitan desviar o tráfico da N-640 arredor de Caldas sen provocar as afeccións sociais e territoriais que xeraba o trazado inicial.

Besteiro sinalou que agora se abre un novo escenario no que o Ministerio estudará unha reformulación da circunvalación da N-640 ao seu paso por Caldas, co obxectivo de atopar unha solución máis axeitada para o territorio.

Ademais, anunciou que, tal e como lle pediu á veciñanza, os socialistas levarán ao Parlamento de Galicia a demanda de recuperar o proxecto da VG-47, unha infraestrutura destinada a conectar o porto de Vilagarcía coa AP-9 e que permanece paralizada pola Xunta desde hai máis dunha década.

Segundo explicou, reactivar esta infraestrutura permitiría mellorar a conexión co porto e avanzar nunha planificación máis ordenada das infraestruturas da comarca: “Hoxe demostramos que cando se escoita á veciñanza e se analizan ben os proxectos pódense tomar decisións máis responsables para o territorio”, concluíu.

Pola súa banda, o alcalde de Caldas, Jacobo Pérez, destacou tamén o traballo realizado nos últimos meses pola veciñanza e polas plataformas afectadas, subliñando que foron meses de reunións, xestións e moito traballo para explicar que o proxecto tal e como estaba prantexado non era a mellor solución para a localidade.

Segundo indicou, a cancelación do proxecto abre agora unha nova etapa na que será necesario seguir traballando para atopar alternativas que permitan reducir o tráfico polo centro da vila e mellorar a mobilidade da comarca.

A plataforma reunirase en breve co Delegado do Goberno e este tema se levará tamén ao pleno municipal.